Astana qalasynda Elbasy qatysýymen «Táýelsizdik urpaqtary» atty Jastar jylynyń saltanatty ashylýy rásimi ótti. Osyǵan oraı Semeıde jastardyń qatysýymen is-sharanyń tikeleı beıne kórsetilimi uıymdastyryldy. Qaladaǵy barlyq jastar uıymdary, stýdentter Shákárim atyndaǵy memlekettik ýnıversıtetiniń Glınkı kóshesinde ornalasqan ǵımaratynda LED ekran arqyly osy jıyndy tamashalady.
Nursultan Nazarbaevtyń aıtqandaı, aldaǵy ýaqytta úzdik 10 kolledj Qazaqstan boıynsha jasalatyn bolady. Al Semeıde de respýblıkaǵa tanymal kolledjder bar. Solardyń biri Muhtar Áýezov atyndaǵy pedagogıka kolledji, onda Alash arystary bilim alǵan. Taǵy bir zamanaýı oqý orny-jumysshy jastardy daıyndaıtyn Semeı elektrotehnıkalyq kolledji. Kolledj dırektory Azat Sarpekov te úlgili jastyń biri.
- Jastardyń bilimdiligi, biliktiligi jaǵynan Qazaqstan álemde 15-inshi orynda tur dep aıtqan Elbasynyń sózine rıza boldym,-dedi Azat Sarpekov,-Qazaqstannyń bolashaǵy jastardyń qolynda. «Táýelsizdiktiń urpaqtary» dep atalatyn jıynda jastar úshin eń basty mańyzdy másele bilim alý kerektigin aıtqandyǵy boldy. Prezıdent jınalǵan jastarǵa búginde barlyq salanyń ózgerip jatqandyǵyn, jańa tehnologııanyń zamany kelgenin aıtty. Sıfrlandyrý júıesin damytý, órkenıetti eldiń qataryna qosylý, mine, osynyń barlyǵy jastardyń qolynda ekeni ras. «Biz mektepte oqyǵanda úıimizde teledıdar da bolǵan joq. Bul aýyldaǵy jerlerdegi kórinis. Radıo endi ǵana shyqqan. Telefondar degendi tipti de bilmeıtinbiz. Qazir bolsa ár 10 jyl saıyn elde túrli tehnologııalar paıda bolýda» degen Prezıdenttiń sózi ár jasqa oı saldy dep oılaımyn.
Jastar saıasatyn qoldaýǵa oraı Elbasy sózine Semeı qalasyndaǵy Jastar Resýrstyq Ortalyǵynyń dırektory Oljas Soǵymbaı da óz pikirin bildirdi:
- Elbasynyń búgingi tapsyrmasy kóńilimizden shyqty.
Kezdesý barysynda Elbasy jastar saıasatynyń mańyzdylyǵy týraly aıtty. Elbasy aıtqandaryn basty nazarǵa alǵan jastar egemendi elimizdiń kemel keleshegin, alyp memleketter qataryna qosylý jolynda qoıylǵan naqty maqsat-mindetterin qurmetteıdi. Olardy júzege asyrý jastardyń bilimdiligine, odan keıin belsendiligine tikeleı baılanysty. Osy oraıda aıta keteıin, Prezıdenttiń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýy tosynnan týyndaǵan qujat emes, bul osydan alty jyl buryn jarııalanǵan «Qazaqstan – 2050» strategııasynyń erekshe belesi. Biz jastar sony túsinip otyrmyz. Rýhanı jańǵyrýǵa barynsha kóńil aýdaryp, tarıhyn biletin, tilin, dinin túsinetin jas urpaqty qalyptastyrýǵa baǵyttalǵan is-sharalar ótkizbekpiz. Qazaq eliniń ult retinde uıysa bilýiniń, ultaralyq túsinistiktiń, tózimdilik pen senimdiliktiń arqasynda bıik belesterdi baǵyndyrdyq. Osy joly da Elbasy jastarǵa senim bildirdi. Bul senimdi biz qalaıda aqtaımyz.
Shákárim atyndaǵy memlekettik ýnıversıtette ótken is-sharaǵa qatysýshylar jıyn sońynda «Biz óz Prezıdentimizben, óz elimizben maqtanamyz! Biz talantty jastarmyz!» dep urandatty.
Raýshan QABJANQYZY,
«Egemen QAZAQSTAN»
Semeı