Azamattyq qorǵaý ofıseri órt kaskalarynyń kolleksııasyn jınaýdy qyzmettik kásibinen bóle-jara qaraǵan emes.
Kolleksııalaý – qyzyqty hobbılerdiń biri. Ár nárseniń óz tarıhy bar, ol týraly kolleksıoner tań atqansha aıtýǵa beıil. Murajaılar men kórmelerdi jıi tamashalaıtyndar stellajdarda qoıylǵan zattar men óner týyndylarynyń ıelerin erekshe qurmetteıtini sondyqtan. Keıbireýler kolleksııalaý isin kásibı qyzmetpen baılanystyrady. Solardyń biri – petropavldyq Bolatjan Asqarbekov. Onyń osy hobbıge degen qyzyǵýshylyǵy keıin bastalsa da, mamandyǵymen baılanystyrýy kezdeısoq emes. Kolleksııa zattary ómir boıy uqypty saqtalyp, urpaqtan-urpaqqa beriletin qundy jádigerler ekenin bilgendikten, kópke deıin júregi daýalaı qoımaǵan sekildi. Bastapqyda áýesqoılyq sezim jeńse, keıin tirnektep jınaýǵa kóshken. Júrgen-turǵan jerlerinde ıakı issaparlarǵa shyǵa qalsa, kolleksııa qataryn tolyqtyrýǵa ańsary aýyp turatyn qasıet qalyptasty.
Segiz jyl boıy kóz maıyn taýysyp jınaǵan dúnıelerin áriptesterinen, tanystarynan attaı qalap alǵanynan bólek ınternet arqyly izdep, jınastyrǵan, satyp alǵan, aıyrbastaǵan. Kásibı órt sóndirýshiniń kıim-kesheginiń bir «bólshegi» ol úshin erekshe ystyq. Úı ishin ózindik orny bar «eksponatqa» toltyrǵanyna esh ókinbeıdi.
Taǵdyrdyń jazýymen talaı ret «ystyq núktelerde» bolǵan sátterde órt kaskasyna qutqarýshy táńirindeı «syıynǵanyn», áriptesterin de ajal qushaǵynan saqtap qalǵanyn umytar emes. Oǵan sol kezdegi eski fotosýretter kýá. Til bitse, shytyrmanǵa toly talaı oqıǵany tizbelep aıtyp berer edi.
Qazir podpolkovnıktiń úıinde ár túrli elderden ákelingen órt sóndirý kaskalary saqtaýly. Germanııa, Belorýs, Reseı, Ulybrıtanııa, AQSh, Úndistan,Chehııa... Tizim osylaı jalǵasa beredi. Keıbiri jyltyraǵan myspen quıylsa, tózimdi plastıkpen qaptalǵandary da kezdesedi.
«Myna biri –meniń jaýyngerlik kaskam. Úsh jyl kıdim. О́rt sóndirý kezinde ár túrli jaǵdaılar bolady, máselen, bóreneler qulaıdy, gaz ballony jarylady degendeı. Sondaı arpalysty sátterde basymdaǵy basty qorǵanym boldy», – deıdi kolleksıoner.
Ol shırek ǵasyrǵa jýyq kásibı órt sóndirýshi retinde tanylyp, talaı márte adamdardy qutqarýǵa basshylyq etken. Qazir de súıikti kásibinen qol úzgen emes. Tótenshe jaǵdaılar departamentinde tótenshe jaǵdaılardy joıý bólimine jetekshilik etedi.
Otty apattarǵa qalaı qarsy turǵanyn ol jadynan eshqashan shyǵarmaıdy. Onyń kolleksııasy - sol kúnderdi eske alýdyń, ártúrli elder men halyqtardyń órt sóndirýshileriniń birigýiniń sımvoly tárizdes.
О́mir ESQALI,
«Egemen Qazaqstan»
Soltústik Qazaqstan oblysy