Batys Qazaqstan oblysynda ótken jyldyń sońynda qurylǵan «Aqjaıyq – adaldyq alańy» jobalyq keńes aıasyndaǵy sarapshylyq toptyń quramyna tilshiler shaqyrylyp jatyr. Bul jóninde joba jetekshisi Orynbek Násımýllın habarlady.
«Aqjaıyq – adaldyq alańy» jobasyna ótken jyly 30 qarashada qol qoıylǵan. Oral qalasyna kelgen Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasy A.Shpekbaev pen Batys Qazaqstan oblysy ákimi A.Kólginov qol qoıǵan bul qujat Qazaqstan Prezıdentiniń 2018 jylǵy halyqqa Joldaýynan keıin dúnıege kelgen «Jemqorlyqtan ada óńirler» jobasy boıynsha júzege asqan bolatyn.
19 jeltoqsanda Batys Qazaqstan oblysy ákimdigi ǵımaratynda «Aqjaıyq – adaldyq alańy» jobasynyń ofısi ashylǵan.
– «Aqjaıyq – adaldyq alańy» jobasynyń maqsaty – Batys Qazaqstan oblysynda azamattardyń memlekettik bılik ınstıtýttaryna senimin arttyrý, jemqorlyq deńgeıin tómendetý jáne sybaılas jemqorlyqty qabyldamaýdyń qoǵamdyq ahýalyn qalyptastyrý, – deıdi joba jetekshisi Orynbek Násımýllın.
Joba turmystyq sybaılas jemqorlyqty joıý, qoǵamdyq baqylaýdy júzege asyrý, sybaılas jemqorlyqqa qarsy mádenıetti qalyptastyrý baǵytynda jumys istemek.
– Tipti jol jóndeý jumystary kezinde tıisti jol belgilerin der kezinde ornatpaýdyń ózi sybaılas jemqorlyq qaýpin týdyrady. Bul jerde memlekettik mekeme men polısııanyń múddesi bolýy múmkin. О́ıtkeni jol belgisi talabyn buzǵany úshin salynatyn aıyppul jergilikti bıýdjetke túsedi. Nemese para túrinde polısııa qyzmetkeriniń qaltasynda ketedi, – deıdi Orynbek Jambyluly.
«Kúndelikti turmysta kezdesetin jemqorlyqty joıý – elimizdiń ár azamatynyń mindeti» deıdi «Aqjaıyq – adaldyq alańy» jobasynyń jetekshisi. Bolashaqta jobalyq keńes aıasyndaǵy sarapshylyq toptyń quramyna jergilikti BAQ qyzmetkerleri shaqyrylmaq.
Qazbek QUTTYMURATULY,
«Egemen Qazaqstan»
Batys Qazaqstan oblysy