Mońǵolııadan kelgen búrkitshi qyz Aısholpan Nurǵaıypqyzy Qazaqstan prezıdenti Nursultan Nazarbaevqa alǵysyn aıtty. Bul týraly Sputnik Qazaqstan habarlady.
Aısholpan jastar jylynyń ashylý saltanatynda Elbasynyń aldynda sóz sóılegenine óte qýanyshty ekenin aıtty. Azdap qobaljyǵanyn da jasyrmady.
«Bul men úshin úlken abyroı boldy dep sanaımyn. Elbasyny kórý meniń armanym bolatyn. Keshe sol armanym oryndaldy. Astanada, atamekenimde bilim alyp jatqanyma qýanamyn. Osyndaı ádemi elordany salǵan Nursultan Ábishuly, sizge alǵysym sheksiz», dedi búrkitshi qyz Sputnik mýltımedııalyq baspasóz ortalyǵynda.
Aısholpan qazir aǵylshyn tilin jaqsartyp júrgen eken. Sondaı-aq, ol Astananyń adamdary men klımatyna toqtaldy.
«Maǵan Astana qatty unady, adamdary da óte jaqsy. Negizi, bizdiń elge qaraǵanda jyly dep aıtsam bolady. Bizde budan da qatty sýyq bolady», deıdi oqýshy qyz.
Búrkitshi qyz qazaqstandyq taraptyń shaqyrýymen Spectrum halyqaralyq mektebinde 11-synypta oqıdy.
«Bilim orda» halyqaralyq qoǵamdyq qorynyń prezıdenti Darhanbek Qojabekovtiń aıtýynsha, mektep oqýshylary Kembrıdj baǵdarlamasymen oqytylady. Al bilim ordasynyń ózi 12 jyldyq.
«Aısholpan qazir aǵylshyn tilin úırenip júr. Bizge kelgende, deńgeıi sál tómen bolǵan soń, biz qosymsha sabaqtar ótkizip júrmiz, muǵalimder de kómektesedi. Biraq, kóp el aralaǵannyń áseri bolýy kerek, Aısholpan tildi ońaı alyp ketip jatyr. Qabileti bar. Sabaǵyn da oqyp, jýrnalısterge suqbat berip te úlgeredi», deıdi Qojabekov.
Halyqaralyq mektepte tegin oqıtyn Aısholpanǵa shákirtaqy da taǵaıyndalǵan.
Jýyrda búrkitshi qyz qysqy demalystarda Mońǵolııadaǵy ata-anasyna baryp kelgen.
«Árıne, ol mekteptiń juldyzy, bári oǵan qoldaý kórsetedi. Birinshi kúni mektepke búrkitti ákelip, baspasóz máslıhatyn ótkizdik», deıdi qor prezıdenti.
23 qańtar kúni Astanada Jastar jylynyń ashylýyna arnalǵan saltanatty jıynda Aısholpan Nurǵaıypqyzy Qazaqstan prezıdentin Baıan-О́lgııge qonaqqa shaqyrǵan bolatyn.