Aqtóbe oblysynyń ákimdiginde óńir basshysy Berdibek Saparbaevtyń tóraǵalyǵymen ótken jıynda Elbasynyń bes áleýmettik bastamasynyń oryndalý barysy talqylandy.
Jıyndy ashqan oblys ákimi jergilikti jaýapty memlekettik organdardyń «7-20-25» ıpotekalyq nesıeleýge, stýdentterge arnalǵan jataqhana qurylysy men eldi mekenderdi gazdandyrýǵa qatysty bastamalaryn júzege asyrý jumystaryn synǵa aldy.
«7-20-25» baǵdarlamasy júzege asyrylǵannan bastap ıpotekalyq turǵyn úı qaryzdaryn alýǵa ekinshi deńgeıli bankterge oblys boıynsha 360-qa jýyq ótinish berilip, olardyń ishinde jalpy somasy 1,7 mlrd teńgege 202 ótinish maquldandy», - dedi oblys ákiminiń orynbasary Serik Tólenbergenov.
Sonymen birge oblys ákimdigi «Baspana ıpotekalyq uıymy» AQ-men bıýdjettik qyzmetkerler, áskerı qyzmetkerler, quqyq qorǵaý organdary úshin bastapqy jarnany baǵdarlama boıynsha 20 paıyzdan 10% -ǵa tómendetý týraly kelisimge qol qoıdy, bul ıpotekany odan saıyn qol jetimdi etedi.
«Bul bizdiń oblystyń QTQJB-degi kezekte turǵandar men salymshylar sany boıynsha kósh basyndaǵy úshtikke kiretinin, sonymen qatar ótken jyly 900 myń sharshy metr turǵyn úı paıdalanýǵa berilgenin eseptegende óte az. Halyq arasynda túsindirý jumysyn kúsheıtip, qurylysty salýshylarmen jáne baǵdarlamanyń operator bankterimen birge tyǵyz baılanysta bolý kerek»,- dedi Berdibek Saparbaev.
Aıta keteıik, baǵdarlamany tabysty júzege asyrý maqsatynda qurylys kompanııalarymen memorandýmdarǵa qol qoıylmaq, soǵan sáıkes jańa qurylystardaǵy páterlerdiń 50 paıyzy «7-20-25» boıynsha júzege asyrylady.
Serik Tólenbergenovtiń stýdentter jataqhanasyn salý boıynsha jobalardyń júzege asyrylýy týraly esebin tyńdap shyqqan oblys ákimi joǵary jáne arnaıy orta oqý oryndaryndarynyń jataqhanalarǵa degen naqty qajettiligin qaıta naqtylaýdy jáne júzege asyrylýǵa josparlanyp jatqan jobalardy olardyń tıimdiligine taldaýdy tapsyrdy.
Serik Tólenbergenov eldi ári qaraı gazdandyrý týraly bastamaǵa qatysty bıyl oblys boıynsha quny 6,06 mlrd. teńgeniń 19 gazben jabdyqtaý jobasy júzege asyrylyp jatqanyn jetkizdi. Ony 2019-2020 jyldary paıdalanýǵa berý josparlanǵan. Sondaı-aq, Hromtaý aýdanynyń Tassaı jáne Kókpekti aýyldaryn gazdandyrý jumystaryn bastap ketý josparlanyp otyr. Nátıjesinde 7 myń halqy bar 13 aýylǵa gaz beriledi.
Oblys ákimi áli kúnge deıin gazben jabdyqtalmaǵan eldi mekenderge gaz júrgizýdiń ekonomıkalyq maqsattylyǵy men tabystylyǵyna taldaýdyń joqtyǵyna narazylyǵyn bildirdi. Bul qujat óńirdi gazdandyrýdyń keleshegin ári qaraı anyqtaý kezinde qarajatty tıimdirek jumsaýǵa múmkindik berer edi.
«Men sizderge belgili bir eldi mekenge gaz júrgizýdiń tıimdiligin esepteýdi baıaǵyda tapsyrǵanmyn. Bul halyq úshin gazdyń qunyna áser etip, jobanyń quny qymbatqa túspeı me? Mundaı gazdyń quny halyq úshin qysqa jaǵatyn kómir qunynan da qymbat bolmaı ma? Qaı aýylda ne paıdalanǵan jón – gaz ba, elektr jaryǵyn ba, álde qatty jáne suıyq otyn ba? Búkil úsh bastamanyń da oryndalýy nashar. Bul baqylaýdyń joqtyǵy saldarynan»,- dedi Berdibek Saparbaev.
Jıyn jalǵasynda oblys ákimi memleket basshysynyń eńbekaqysy 25 AEK-ten nemese 63 125 teńgeden tómen qyzmetkerlerdiń salyq júktemesin 10 ese tómendetý jónindegi bastamasynyń júzege asyrylýyn jalǵastyrýdy tapsyrdy. Ekonomıka jáne bıýdjetti josparlaý basqarmasynyń basshysy Gúlqasıma Súıintaeva: «Atalmysh salyq jeńildigine 92 myńnan astam adam ıe boldy. Nátıjesinde olardyń jalpy kirisi 1,6 mlrd teńgeni quraıtyn bolady»,- dep jetkizdi.
«Eshkim esepsiz qalmas úshin eń tómen eńbekaqy ósimin de baqylaýda ustaý qajet. Eńbekaqysyn kóterýdi qajet etetin árbir adam ony alýǵa tıis», - dedi Berdibek Saparbaev.
Oblys ákiminiń orynbasary Qaırat Bekenov nesıeleýdi keńeıtý bastamasynyń júzege asyrylýy jóninde esep berdi. Byltyr shaǵyn jáne orta bıznes úshin shaǵyn nesıeleýge 4,9 mlrd. teńge bólingen. Qarajattyń kóp bóligi, atap aıtqanda 3,9 mlrd. teńge ShOB sýbektilerine, aýylda jumys isteıtinderge berildi. Jalpy, Aqtóbe oblysy jyl qorytyndysy boıynsha QR óńirleri arasynda shaǵyn nesıeleý qarajatyn ıgerýde kósh basyna shyqty. Aýqymdy memlekettik qoldaýdyń nátıjesinde ShOB-tegi óndiris ósimi 121% qurady, shaǵyn jáne orta bıznestiń jalpy óńirlik ónimdegi úlesi 25 paıyzǵa jetip, 3,2%-ǵa ósti»,-dep atap ótti Q.Bekenov. Qosa keteıik, osy jyly ShOB-ti shaǵyn nesıeleýge 5,1 mlrd teńge aýdarylmaq.
«Elbasynyń barlyq tapsyrmalary ýaqytynda ári sapaly oryndalý kerek. Bizdiń oblys óz rezervterin tolyq paıdalanyp otyrǵan joq. Sondyqtan birinshi kezekte, «7-20-25» boıynsha jumysty «Baspanamen» jáne qala ákimdigimen birge kúsheıtýdi tapsyramyn. Jataqhanalar boıynsha naqty qajettilikti anyqtaý kerek. Shaǵyn nesıeleý boıynsha jumys, jalpy, jaman emes. Biraq munda paıdalanylmaǵan rezevter de bar, ásirese halyqaralyq granttardy tartýda. Bastamaǵa barynsha jastardy tartyńyzdar. Árbir aqtóbelik jas máselen, baspanaly bolyp, óz isin ashyp, memleket qoldaýyn alyp jáne taǵy da basqasha osy jyldyń artyqshylyǵyn iste sezinýi kerek. Barlyq bastamanyń júzege asyrylýyn únemi baqylaýda ustańyzdar»,-dedi sózin túıindegen oblys ákimi.
Temir QUSAIYN,
«Egemen Qazaqstan»