Jastar jylynyń resmı ashylýyna oraı ótken forým joǵary deńgeıde uıymdastyryldy. Memleket basshysy jastardyń kórnekti ókilderiniń oı-usynystaryn tyńdap, olar boıynsha Úkimetke naqty tapsyrma berdi.
Tapsyrmanyń barlyǵy jastar asa zárý 4 salany qamtıdy – bilim alý, jumys, baspana men otbasyn qurýǵa jaǵdaıdyń bolýy. О́zgesin aıtpaı-aq nazarymdy aýdartqan jańalyq – shaǵyn nesıe berýdiń jáne oqytý isiniń oń tájirıbesi negizinde barlyq óńirde «Jas kásipker» baǵdarlamasyn ázirleý qajet dedi. Odan bólek Úkimetke «Bıznestiń jol kartasy-2020» baǵdarlamasy aıasynda jas kásipkerler úshin grant boıynsha bólinetin qarjy kólemin eki ese arttyrýdy tapsyrýy. Bul jastardyń kásipkerlikpen aınalysý yntasyn arttyryp, olarǵa múmkindik týǵyzý, bilim men bilik básekelestigi dendegen zamanaýı jaǵdaıda asa qajetti qadamdar ekeni mańyzdy.
Taǵy bir erekshe yntyzarlyqpen qabyldaǵan jańalyǵym, volonterlyqpen aınalysatyn stýdentterdiń stıpendııasyn 30 paıyzǵa kóterýdi Úkimetke tapsyrýy. Menińshe, óte qajetti bastama. Barsha álemde jastardyń ómirden óz ornyn taýyp, kirpish bolyp qalanýy olardyń áleýmettenýine baılanysty. Qoǵamdyq jumysqa aralasyp, erikti retinde qoǵam ıgiligi úshin izgi amalǵa kóp barǵan jan eń aldymen elge janashyr.
Álemniń mańdaıaldy joǵary oqý oryndary oqýǵa qabyldarda jas azamattyń volonterlyqpen qanshalyqty aınalysqanyna zor mán beredi. Jýrnalıst ári pedagog retinde kóńilimdi serpiltkeni – Prezıdenttiń irgeli jáne qoldanbaly ǵylymdar zertteýlerin granttyq qarjylandyrýdy 3 mıllıard teńgege kóbeıtý týraly Úkimetke tapsyrmasy.
Qanat ÁÝESBAI,
Prezıdent janyndaǵy Jastar saıasaty jónindegi keńes múshesi, QR Tuńǵysh Prezıdenti-Elbasy kitaphanasynyń aǵa sarapshysy