Jaqynda iske qosylǵan Digital agent mobıldi qosymshasy memlekettik qyzmetshilerdiń jumys sapasyn saralaýǵa jol ashty. Ásirese, sheneýnikterdiń jumysyna qatysty jıi syn aıtatyn turǵyndar úshin bul taptyrmaıtyn múmkindik bolyp otyr.
Máselen, Almaty oblysynyń turǵyndary mobıldi qosymshany qoldana bastaǵaly beri 392 habarlama joldaǵan. Adamdardyń aryz-shaǵymynan bólek alǵys aıtyp, sáttilik tilegen hattar da kelip túsýde. Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti ár habarlama boıynsha saraptama jasap, tıisti shara qabyldaýǵa kiristi.
- Azamattardyń memlekettik qyzmet sapasyna qatysty shaǵymdaryna lezde jaýap berý kún tirtibinde tur. Agenttik osy maqsatta Digital agent mobıldi qosymshasyn iske qosqan bolatyn. Bul qurylǵy qazir turǵyndar arasynda keńinen nasıhattalýda. Uıaly telefonǵa júkteletin arnaıy baǵdarlama arqyly kez kelgen ýaqytta ótinish, talap-tilek bildirýge bolady. Adamdar da baǵdarlamany qoldanýǵa jyldam beıimdelýde. Jyl basynan beri 392 habarlama aldyq. Shaǵymdar boıynsha jedel áreket etýdemiz, - deıdi Memlekettik qyzmet isteri jáne sybaılas jemqorlyqqa qarsy is-qımyl agenttigi Almaty oblysy boıynsha Departamentiniń baspasóz hatshysy Symbat Israpýlova.
Qazir departament bul baǵyttaǵy jumystarǵa ekpin berip jatyr. Digital agent mobıldi qosymshasynyń tıimdiligi týraly oblystyń Aqsý, Uıǵyr, Sarqan, Talǵar, Balqash, Kerbulaq, Alakól, Qaratal, Raıymbek, Kegen, Eńbekshiqazaq aýdandary men Tekeli qalasyndaǵy Halyqqa qyzmet kórsetý ortalyqtarynda tanystyrylym ótkizgen eken. Aımaqtaǵy eldi mekenderge de qosymshany qoldanýǵa qatysty nusqaýlyq jazylǵan 25 bılbord ilinipti. Al Digital agent mobıldi qosymshasyn uıaly telefonǵa Apple store jáne Play Market baǵdarlamasy arqyly júktep alýǵa bolady.
Aıtpaqshy, Memlekettik qyzmet isteri jáne sybaılas jemqorlyqqa qarsy is-qımyl agenttigi Almaty oblysy boıynsha Departamentiniń qyzmetkerleri azamattar úshin qolaıly taǵy bir mobıldi jobany qadaǵalaýǵa kiristi. Jaqynda Taldyqorǵan qalasy boıynsha Smart aıaldama keshenderi iske qosylmaqshy, sol kezde Infobus mobıldi qosymshasy da paıdalanýǵa beriledi. Bul qosymsha arqyly qalaishilik qoǵamdyq kóliktiń qozǵalysyna baqylaý jasap, qyzmet sapasyn baǵalaýǵa múmkindik týady. Departament mamandary «Jetisý – adaldyq alańy» jobasy aıasynda mobıldi qosymshalar arqyly buqaramen tikeleı baılanysta bolý qyzmet kórsetý sapasyn arttyrýǵa ǵana emes, qoǵamdyq sananyń saýyǵýyna da yqpal etedi deıdi.
Qalmahanbet MUQAMETQALI,
«Egemen Qazaqstan»
Almaty oblysy