Bul týraly ınvestısııalardy tartý jáne ınvestısııalyq ahýaldy jaqsartý jónindegi aımaqtyq keńes otyrysynda málim boldy. Otyrysta jalpy quny 30 mıllıard teńgeni quraıtyn tórt ınvestısııalyq joba qaraldy.
Batys Qazaqstan oblysynyń ákimi Altaı Kólginov memlekettiń basym baǵyttarynyń biri – ınvestısııa tartý úshin qolaıly ortany qalyptastyrý ekendigin, Prezıdent N.Á.Nazarbaev memlekettik organ basshylaryna ınvestısııalardy tartý boıynsha jumysty shıratýdy tapsyrǵanyn aıta kelip, ınvestısııalyq tartymdylyq – óńir ekonomıkasy úshin negizgi faktor bolatynyn atap ótti.
- El ekonomıkasyna ınvestısııa tartý – biz úshin negizgi baǵyttyń biri. Memleketimizde yńǵaıly ınvestısııalyq ortany jaqsartý men ınvestısııalyq tartymdylyqty arttyrý jumysy qarqyndy júrýde. Investorlar úshin qolaıly jaǵdaı jasalýda. Ekonomıkany ártaraptandyrý boıynsha jumysty jalǵastyramyz. Bizdiń óńir bul jobalardyń júzege asýyna nıetti, - dedi óńir basshysy.
Aımaqtyq keńeste aýyl sharýashylyq salasynda eki joba tanystyryldy. Máselen, «AMANAT» sharýa qojalyǵy Bórli aýdanynda 2,5 mıllıard teńgeni quraıtyn sút óndirý keshenin óz qarajatyna salýdy josparlaǵan. 600 bas sıyrǵa arnalǵan keshenniń jyldyq sút óndirisi 1525 myń tonnaǵa jetpek. Keshenniń qurylysyna 30 adam tartylsa, zaýyt iske qosylǵan soń 10 adam turaqty jumyspen qamtymaq.
Osy otyrysta «Ringo-Milk» JShS Terekti aýdanynda 1500 saýyn sıyrǵa eseptelgen, quny 3,9 mıllıard teńgeni quraıtyn sút óndirý keshenin salý jobasymen tanystyrdy. Italııandyq kompanııamen birlesken keshen jylyna 7 myń tonna sút jáne sýarmaly jerden jylyna 8 myń tonna qunarly mal azyǵyn óndirýge qaýqarly. Sút zaýyty qurylysyna 150 adam, al iske qosylǵan kezde 40 adamdy turaqty jumyspen qamtıdy.
«Oral transformator zaýyty» JShS ónim túrleri men kólemin kóbeıte otyryp, qýattylyǵy 35-500 kV transformatorlarǵa arnalǵan paneldik radıatorlar óndirisin iske qosýdy josparlaǵan. Jalpy quny 3,9 mlrd teńgeden asatyn joba iske qosylǵanda 100-den astam jańa jumys oryny ashylmaq. Zaýyt basshylary qyzmetkerlerine yńǵaıly jaǵdaı jasaý úshin birinshi qabaty balabaqshamen, saýda ornymen, sport oryndarymen qamtylǵan 9 qabatty turǵyn úı salýdy josparlap otyr eken.
Sonymen qatar,«K7 GROUP» qurylys kompanııasy Oral qalasy mańynan kóp qabatty turǵyn úıler salýǵa nıetin bildirdi. Investor óz esebinen bul jobaǵa 20 mıllıard teńgeden asatyn qarjy jumsamaq. Qurylysqa jergilikti materıaldy paıdalaný josparlanǵan. Boı kóteretin úıler memlekettik baǵdarlamalarmen jáne jeńildetilgen baǵamen óńir turǵyndaryna usynylmaq. Aqtaýlyq «K7 GROUP» kompanııasyna usynylǵan úsh jer teliminiń biri – Oral qalasynyń burynǵy Et kombınaty aımaǵy eken. Oblys ákiminiń aıtýynsha, bul aýmaq áýeli jergilikti qurylys kompanııalaryna usynylǵan, biraq olar bas tartqan.
Qazbek QUTTYMURATULY,
«Egemen Qazaqstan»
Batys Qazaqstan