«Almaty» shekaralyq baqylaý otrıadynyń shekara narıady Almaty qalasynyń halyqaralyq áýejaıynda búgin (26 qańtar 2019 jyl), túngi saǵat 4 shamasynda «Almaty - Dýbaı» baǵytymen ushqaly turǵan FZ – 736 áýe reısiniń jolaýshylarynyń arasynan 1987 jyly týǵan «P» degen Qazaqstan azamatyn ustady. Bul týraly QR UQK ShQ baspasóz qyzmeti habarlady.
Ol ózimen birge deklarasııalanbaǵan 16 000 AQSh dollaryn alyp ketpek bolǵan eken. Aqsha aktilenip «Jetisý» keden beketine tapsyryldy. Qorǵastaǵy Halyqaralyq shekara boıy yntymaqtastyǵy ortalyǵynyń aýmaǵynan, dálirek aıtqanda Qazaqstanǵa qaraı kiretin zaldan shekarashylar keden beketiniń qyzmetkerlerimen birge jalpy salmaǵy 110 kg-ǵa jýyq ıesiz zattar (kıim-keshek pen tósek jabdyqtary) taýyp alyp, aktimen «Altynkól» keden beketiniń qyzmetkerlerine tapsyrdy.
Saryaǵash shekara otrıadynyń «Qazyǵurt-avto» ótkizý bólimshesinde Shekarashylardyń esirtki izdeýge arnaıy úıretilgen qyzmettik ıti jolaýshylar termınalynyń ishinde О́zbekstannan bizdiń elge qaraı ótip kele jatqan 1983 jylǵy ózbekstandyqty meńzedi. Shekarashylar bul azamatty jeke alyp shyǵyp teksergen kezde onyń shulyǵynyń ishinen jabysqaq lentamen oralǵan 3 túıinshek taýyp aldy. Bul saraptama qorytyndysy boıynsha, jalpy salmaǵy 65 gramǵa jýyq keptirilgen marıhýana bolyp shyqty. Ustalǵan azamat aıǵaq zatymen birge ishki ister organdarynyń qyzmetkerlerine tapsyryldy.