Romeo mahabbat úshin jaratylǵan. Biraq talaıdan beri ol súıgenine qosylǵan joq. Onyń uıalshaq ekeni, qurt jeıtini, kirpigi joq ekeni anyq. Ári jasy onnan asyp ketti. Alaıda osy jasyna qaramastan, ol – erekshe jigit.
Djoanna KLEIN,
«Nıý-Iork Taıms»
Romeo – Sehýenka sý baqasy. Buǵan deıin ol óz túrleriniń sońǵysy dep eseptelip kelgen. Ol Bolıvııadaǵy Museo de Historia Natural Alcide d’Orbigny mýzeıinde akvarıýmde jalǵyz ómir súredi. Alǵash ret Romeony 10 jyl buryn taýyp alǵanda sol aımaqtaǵy baqalarǵa sańyraýqulaq aýrýy qaýip tóndirip turǵan edi.
Zertteýshiler ony mýzeıdiń kóbeıtý jáne qorǵaý ortalyǵyna ákelgennen keıin taǵy bir baqany taýyp, olardy saqtap qalýdan úmittengen bolatyn. Olar ózen boıyn sharlap, túk tappady. «Álemdegi jalǵyz baqa» atanǵan Romeoǵa «qalyńdyq» kerek edi. Sondyqtan byltyr tabıǵat qorǵaýshylar Match.com saıtynda oǵan arnap akkaýnt ashqan edi. Adamdar Romeonyń mahabbat álegin jaqsy túsindi. Aqyry ótken jylǵy Valentın kúninde Romeonyń Djýlettasyn tabý maqsatynda kompanııa men baqanyń jankúıerleri ekspedısııa úshin 25 000 dollar jınap berdi.
Álbette, Djýletta tabyldy. Endi Romeo boıdaqtyqtan qutylady. Tabıǵat qorǵaýshylardyń úmiti qaıta oıandy. Ekeýin kezdestirgende bári oıdaǵydaı bolsa, olardyń balalary tabıǵatqa jiberiledi. Al baqalardyń odan keıingi ómiri qalaı bolatynyn ýaqyt kórsetedi.
Byltyr ekspedısııa jolǵa shyqqanda, tarıhı derekterdiń kómegi tıgen joq. Bolıvııadaǵy Sehýenkas aýdany joıylyp ketip, onyń ornyna alyp sý qoımasy salynǵan. Jergilikti gıdter komandany tushy aǵystarǵa apardy. Bir kezderi baqa túrleri myńǵyrǵan ózen jaǵasy búginde múlgigen tynyshtyqqa oranǵan. Al Romeonyń aǵaıyndary eshqashan sýdan shyqpaıtyn erekshelikke ıe.
Izdeý jumystary sýyqqa, ylǵalǵa, qıyndyqqa qaramastan jalǵasa berdi. Qas qaraıa bastaǵanda zertteýshilerdiń úmiti úzile bastaǵan-tuǵyn. Biraq sońǵy jylǵany tekserip kórýge bel baılady. Osy arada mýzeıdiń gerpetologısi Tereza Kamacho Badanı sarqyramadan sýǵa sekirip túsken baqany baıqap qaldy. Ol jándik túsken jerge júgirip baryp, sýǵa súńgip, Sehýenkas sý baǵasyn alyp shyqty. Djýletta tabyldy! «A, qudaı! Taptym ony» dep aıqaı saldy ol. Komanda músheleri keıinirek osy aradan taǵy bir analyq jáne úsh atalyq baqany keziktirdi.
Djýlettanyń jaǵdaıy jaqsy bolǵanyna qaramastan, Romeomen jolyqqanǵa deıin ony karantınge qoıdy. «Alǵash kezdesýden keıin Romeonyń aýyryp qalǵanyn qalamaımyz», deıdi doktor Kamacho Badanı. Djýletta tabıǵatta ósken, kúsh-qýatqa toly ári Romeo sekildi kameraǵa qamalǵan emes. Alaıda ekeýi de qurttardy jaqsy kóredi. Eger osy arqyly olar til tabysyp ketse, komanda Romeo men Djýlettanyń balalaryn tumsa tabıǵatqa jiberýge nıetti. Áıtse de, áýeli zertteýshiler baqalardyń deni saý bolýyn qadaǵalap, sańyraýqulaq aýrýyna qanshalyqty tózimdilik tanytatynyn anyqtaý kerek.
Doktor Kamacho Badanı ǵashyǵyn izdep jalǵyz júrgenderge aıtatyn ósıeti bar: «Sońy baqytty aıaqtalatyn izdeý jumysyn eshqashan toqtatpa».