Almatydaǵy Ulttyq kitaphanada belgili aqyn, Qazaqstannyń eńbek sińirgen qaıratkeri, M.Maqataev atyndaǵy syılyqtyń eki márte ıegeri, aıtys aqyndary men jyrshy-termeshilerdiń Halyqaralyq Odaǵynyń basqarma tóraǵasy Júrsin Ermannyń bes tomdyq shyǵarmalar jınaǵynyń tusaýkeseri bolyp ótti.
Aqynnyń kóptomdyǵynyń alǵashqy eki tomyna óleńderi, úshinshi tomyna óziniń túrli taqyryptarǵa, jeke tulǵalarǵa arnalǵan esseleri jınaqtalǵan, tórtinshi tomyna J.Erman týraly jazylǵan maqalalar toptastyrylǵan, al besinshi tomy aqynmen qurylǵan suhbattarǵa arnalǵan. Jınaqtar Mádenıet jáne sport mınıstrliginiń qoldaýymen Almatydaǵy «Sardar» baspa úıinen jaryq kórip otyr.
Ádebıet kóshine qosylyp otyrǵan kóptomdyqtyń tusaýkeseri sharadan góri shaǵyn shyǵarmashylyq keshi sekildi uıymdastyrylýy onyń mazmunyn da, mańyzyn da arttyra tústi. Ádebı keshke jınalǵan qaýym aldymen aqyn týraly, onyń poezııaǵa qosqan parasatty óleńderiniń qýaty, jalpy shyǵarmashylyq joly men ómiri jaıly beınefılm tashalady.
Keshti aqyn, Qazaqstannyń eńbek sińirgen qaıratkeri Janarbek Áshimjan júrgizip otyrdy. Ol keshtiń mazmunyna toqtalyp, shaıyr shyǵarmashylyǵynyń ereksheligine, ádebıetke ákelgen jańalyǵyna jan-jaqty sholý jasady. Betashar sózdi alǵan Almaty qalasy ákiminiń orynbasary Arman Qyryqbaev jańa kitaptardyń jaryqqa shyǵýymen quttyqtap, aqynnyń qazaqtyń aıtys óneriniń jańa mektebiniń qalyptasýyna qosqan úlesin, jalpy ádebıettegi ornyn saralap, oqyrmany retinde oń baǵasyn berdi.
Qyzdar pedagogıkalyq ýnıversıteti stýdentteriniń aqyn óleńderinen quralǵan kompozısııasy aqyn týraly júrekjardy lebizderge, onyń sózine jazylǵan ánderge ulasty. «Seıhýn» toby Júrsin Ermannyń sózine jazylǵan Jarylqasyn Dáýletovtiń «Jalǵyz ulym», Súleımen Ibragımovtyń oryndaýyndaǵy Altynbek Qorazbaevtyń «Baqanas jerdiń – baıtaǵy», «Syńarym» atty ánder ádebı keshtiń ajaryn asha tústi. KSRO halyq ártisi, Eńbek Eri Asanáli Áshimov, aqyn, aýdarmashy Qýanyshbaı Qurmanǵalıev, palýan, Olımpıada jeńimpazy Dáýlet Turlyhanovtar aqyn týraly qyzyqty estelikterimen bólisti.
Arda ónerdi ardaqtap, talaı talantty aqynnyń tusaýyn kesken J.Ermannyń ádebı keshi bir úzik aıtys úlgisin kórsetpeı óte almasy anyq. Tanymal aıtys aqyndary Balǵynbek Imashev, Rústem Qaıyrtaıuly, Bolatbek Orazbaev, Jandarbek Bulǵaqov, Muhtar Nııazov sııaqty dúldúlder aıtys óneriniń kóshin órge súırep kele jatqan janashyr tulǵaǵa jyrdan shashý shashyp, keshke jınalǵandardy shabytty óleń órnegimen bir jelpindirip tastady.
Esterińizge sala ketsek, aqynnyń buǵan deıin «Janartaý», «Araıly kún, armysyń!», «Ulytaýǵa bardyń ba...», «Qudiretke júginý», «Eki tizgin, bir shylbyr», «Qustyń kóleńkesi», «Yrǵaı», «Arnadym sizge», «Kóktóbedegi kezdesýler», «Alystan jáne jaqynnan», «Asyl Ajar», «Ularyń qaıda Ulytaý?» atty kitaptary jaryq kórgen bolatyn.
Aıgúl AHANBAIQYZY,
«Egemen Qazaqstan»
ALMATY