Aldyńǵy aptanyń sońynda Ispanııanyń Malaga provınsııasynda 100 metrlik qudyqqa túsip ketken 2 jasar Iýlendi izdeý operasııasy qaıǵyly jaǵdaımen aıaqtaldy. Bul týraly EURONEWS habarlady.
Búgin túnde balanyń óli denesi tabyldy. Ispanııa premer-mınıstri men korol balaqaıdyń otbasyna kóńil aıtty.
Osy jolǵy qutqarý operasııasy Ispanııa tarıhyndaǵy eń kúrdeli ári aýyr oqıǵa boldy. Balany alyp shyǵý úshin jańadan tonnel qazyp, jerasty galereıasynyń bir bóligin shahterlerdiń qolmen qazýyna týra keldi.
Degenmen eshteńege qaramastan balany aman alyp qalý múmkin bolmady.
«Iýlenniń ata-anasynan shuǵyl habar túsken sátten bastap Malaga polısııasy tergeýdi bastady. Quqyq qorǵaý organdary balanyń qudyqqa qalaı qulap ketkenin, nege olaı bolǵanyn bastan-aıaq anyqtaıtyn bolady», - dep málim etti Euronews.