Taekvondodan Qazaqstan ulttyq quramasynyń sportshylary Almaty qalasynda oqý-jattyǵý jıyndaryn ótkizýde. Quramanyń aǵa bapkeri Batyrbek Esdáýletovtiń aıtýynsha, 26 sportshy reıtıngilik týrnırlerge daıyndalyp jatyr dep habarlaıdy Olympic.kz.
- Jattyǵý jıynyna Qazaqstan ulttyq komandasynan bólek, Aqtóbe, Pavlodar oblystarynan jáne Aqtaýdan sportshylar qatysýda. Daıyndyq joǵary deńgeıde ótip jatyr. О́ıtkeni, bıylǵy maýsym taekvondoshylar úshin ońaıǵa soqpaıtyny anyq. Bizdi birneshe iri reıtıngilik jarystar kútip tur. 2020 jylǵy Tokıo Olımpıadasyna upaı jınaıtyn kezeń bastaldy, - deıdi aǵa bapker.
Qazaqstan taekvondoshylary úshin jyldyń eń alǵashqy resmı jarysy Birikken Arab Ámirlikteriniń Fýdjeıra qalasynda ótedi.
- Fujairah Open týrnıri G1 sanatyndaǵy óte mártebeli jarystardyń biri. Atalǵan básekege qatysatyn sportshylar tizimi de belgili. Arab Ámirlikterinen soń Túrkııada ótetin eki týrnırge qatysý josparda bar. Onyń biri – eýropalyq aımaqqa arnalǵan prezıdent kýbogi dodasy. Ekinshisi – Turkish Open básekesi. Túrkııadaǵy jarystar aıaqtalǵan soń, tikeleı Mysyrdaǵy halyqaralyq týrnırge jol tartamyz. Taekvondoshylar úshin maýsym osylaı jalǵasyn taba bermek», - dedi Batyrbek Esdáýletov.
1-3 aqpan aralyǵynda ótetin Fujairah Open týrnırinde Qazaqstan namysyn tómendegi sportshylar qorǵaıdy:
Eldos Ysqaq, Eldar Birimbaı, Qaırat Sarymsaqov, Nurlan Myrzabaev, Rahym Ádilhanov, Azamat Teńibaev, Rýslan Japarov, Aınur Esbergenova, Farıza Aldońǵarova, Jansel Denız, Mereke Júnisova, Smaıyl Dúısebaı jáne Aıtýar Sháıkenov.