Balamaly kózderden elektr qýatyn óndiretin bul jel elektr stansııasynyń qurylysy Bulaqsaı aýyldyq okrýginde qolǵa alyna bastady. Stansııanyń árqaısysy 50 MVt elektr qýatyn óndiretin eki bóligin iske qosý 2019 jáne 2020 jyldarǵa josparlanyp otyr.
Jel elektr stansııasyn tolyq paıdalanýǵa bergende aýaǵa parnıkti gazdardyń bólinýi jylyna 230 myń tonnaǵa azaıady. Stansııanyń ózi on myńnan astam otbasynyń elektr qýatyna degen qajetin ótep, ony óndirýge jumsalatyn shyǵyndy birneshe eselep azaıtýǵa múmkindik beredi. Qurylys barysynda 300-ge deıin jumys orny ashylyp, jel elektr stansııasy paıdalanýǵa berilgennen keıin de oǵan qyzmet kórsetý úshin 20 turaqty jumys orny saqtalady. Jergilikti mamandardyń biliktiligin kóterý shet elde iske asyrylmaqshy.
Jel parki barlyǵy 119 gektar jer teliminde ornalasatyn bolady. Kún kózinen qýat alatyn elektr stansııalarynan bir ereksheligi, bul alańdy tolyq qorshaýdyń da qajeti joq. Ashyq bolǵannan keıin onda adamdardyń júrýi men maldyń jaıylýyna eshqandaı tosqaýyl qoıylmaıdy.
Baıqal BAIÁDIL,
«Egemen Qazaqstan»
Arshaly aýdany,
Aqmola oblysy.