2015 jyly «ǵasyr indetine» shaldyqqandardyń sany 500 bolsa, búginde bul kórsetkishtiń eki esedeı kóbeıgeni baıqalady.
Bul kesel jóninen respýblıkada aldyńǵy oryndardyń birin ıelenetin óńir dárigerleriniń aıtýynsha aıyqpas dertke shaldyqqandardyń 80 prosenti – 30 ben 49 jas aralyǵyndaǵy azamattar. Deni – jumyssyzdar.
«2017 jyly 230 adamda, byltyr 170 adamda AITV ınfeksııasy anyqtaldy. Epıdemıologııalyq jaǵdaı turaqty. Degenmen baqylaýdy bir sát te bosańsytýǵa bolmaıdy», deıdi SPID-tiń aldyn alý jáne oǵan qarsy kúres jónindegi ortalyqtyń bas dárigeri Aıman Syzdyqova.
Aılyq aksııa barysynda erikti túrde tekserýden ótken 8 myńǵa jýyq turǵynnyń ishinen toǵyz adamnyń boıynan AITV ınfeksııasy tabylǵan. Elimizde AITV ınfeksııasyna shaldyqqan árbir adamnyń tegin retrovırýske qarsy em qabyldaý múmkindigi bola tura soltústikqazaqstandyqtardyń 75 prosenti ǵana turaqty túrde em qabyldaıdy. SPID ortalyǵy emdelýshiler sanyn 90 prosentke deıin jetkizýdi kózdep otyr.
Mamandar óńirimizde esirtki qoldanýshylardyń esebinen AITV ınfeksııasyna shaldyǵý jaǵdaılary jıilegenin jasyrmaıdy. Sońǵy ýaqytta beleń alǵan sıntetıkalyq psıhotropty zattardyń saýdasyna dem berip turǵan da – osy ınternet. “Spaıs”, “tuz” dep atalatyn zattar esirtkige táýeldilikti qalyptastyratyndyǵymen qaýipti. Búginderi mundaı zattardy taratýshylarmen kúres ázirge jurtshylyqtyń, belsendi azamattardyń kómegimen jarnamalardy der kezinde óshirý arqyly ǵana júrgiziledi. Onyń aqyry qorqynyshty dertke ákelip jatqanyn ómirdiń ózi kórsetip otyr.
О́mir ESQALI,
«Egemen Qazaqsttan»
Soltústik Qazaqstan oblysy