Aqmola oblystyq Ishki saıasat basqarmasy óńirdegi jastar saıasatynyń júzege asyrylý barysyn talqylaý úshin brıfıng ótkizdi.
Jastar jylyna oraı, Ishki saıasat basqarmasy ótken jyldy qorytyndylap, aǵymdaǵy jyldyń josparlarymen bólisti. О́tken jyldyń ózinde túrli memlekettik baǵdarlamalardyń aıasynda 4800 jas eńbekke ornalastyrylsa, onyń 300-ge jýyǵy «Dıplommen – aýylǵa!» baǵdarlamasy boıynsha eldi mekenderge jol tartqan. Búginde 276 adam oblys ákiminiń shákirtaqysyn alady. Bir jyldyń ishinde 50 myń jasty qamtyǵan 600-ge jýyq is-shara ótkizilgen.
– Jastar jyly aıasynda «Aqmola jastary» baǵdarlamasy bastaý aldy. Búginde oblystaǵy jastardyń sany 150 myńǵa jýyq. Bul baǵdarlama aıasynda Kókshetaýda 424 otbasyna arnalǵan 6 turǵyn úı salynatyn bolady. Aǵymdaǵy jyly 4 bes qabatty jáne 2 toǵyz qabatty úıdiń qurylysy bastalmaq. Bul úılerdi satyp alatyn úmitkerlerge qoıylatyn basty talaptar – jasy 35-ten aspaýy qajet jáne oblysta turyp, jumys isteýi kerek. Eń joǵarǵy qaryz somasy 10 mıllıon teńgeni quraıtyn bolady, – deıdi oblystyq Ishki saıasat basqarmasynyń bólim jetekshisi Damır Irgebaev.
Búginde «Rýhanı jańǵyrý» jobalyq keńsesi de jastarmen belsendi jumys júrgizýde. Jastar jylyna oraı oblys ortalyǵynda Jastar teatry qurylatyn bolady. 20 aqpan kúni Dostar mádenıet saraıynda teatrdyń alǵashqy premerasy ótedi. Budan bólek, jobalyq keńse balabaqsha, mekteptermen, joǵary oqý oryndarymen de jumys júrgizýde.
– Kelesi aptada balabaqshalardy aralap, qazaqsha mýltfılmder jazylǵan dıskti aparyp berip, keıipkerlerin oınatyp, sol arqyly olardy ulttyq dúnıetanymǵa baýlımyz, tartamyz. Odan qala berdi joǵary oqý oryndarynda til marafonyn ótkizbekpiz, – deıdi «Rýhanı jańǵyrý» jobalyq keńsesiniń jetekshisi Mergen Toqsanbaı.
Jastar saıasatyn júzege asyrýda «Nur Otan» partııasynyń janyndaǵy «Jas Otan» Jastar qanaty da eleýli úlesin qosýda. Máselen, búgingi kúni «Jas Otannyń» quramynda 9000-ǵa jýyq belsendi bar. Olar 16 men 29 jas aralyǵyndaǵy jastar. Jasotandyqtar qoǵamnyń barlyq salasyna belsene aralasyp, jastardy yntalandyrýǵa, damytýǵa baǵyttalǵan jobalardy júzege asyrýda.
Baıqal BAIÁDIL,
«Egemen Qazaqstan»
Aqmola oblysy