«Jastar jyly» aıasynda Qyzyljar aýdanynyń ortalyǵy – Beskól aýylynda jastarǵa qyzmet kórsetý ortalyǵy paıdalanýǵa berildi.
«Nur Otan» partııasy aýdandyq fılıalynyń ǵımaratynda ornalasqan jańa keńsede memlekettik baǵdarlamalar, kásipkerlik, jumysqa ornalasý, bilim alý baǵyttary boıynsha aqyl-keńester, basqa da maǵulmattar beriledi. «Qyzyljar» jastarǵa qyzmet kórsetý ortalyǵynyń keńesshisi Gúlásel Hamıtovanyń aıtýynsha, byltyr Petropavl qalasynda ótken semınarǵa Almaty, Taldyqorǵan qalalaryndaǵy jastarǵa qyzmet kórsetý ortalyǵynyń ókilderi kelip, tájirıbe almasypty. Keıin jergilikti bılik oryndaryna ortalyq ashý týraly usynys bildirip, qoldaý taýypty. Munda aýdandyq jumyspen qamtý ortalyǵynyń mamandary eńbekpen qamtý, jumysqa ornalasý máseleleri boıynsha kómektesip otyrady. «Bastaý bıznes» jobasy aıasynda quqyqtyq keńester alýǵa bolady.
Keńseniń ashylýymen jınalǵandardy aýdan ákimi Janat Sádýaqasov quttyqtady.
«Qazirgi tańda myńǵa jýyq qyzyljarlyq jas ýnıversıtette, kollejderde oqyp jatyr. Olardyń júzge jýyǵy bıyl bilim oshaqtaryn támamdap, maman ıesi atanady. Keıin, jerlesterimiz osy jerdegi qyzmetkerlerge júginip «Dıplommen aýylǵa» baǵdarlamasy arqyly jumysqa ornalasa alady. Jalpy, atalǵan joba jarııalanǵaly Qyzyljar aýdanyna 830 jas kelip, eńbekpen qamtyldy», dedi ol óz sózinde.
«Qyzyljar» jastarǵa qyzmet kórsetý ortalyǵy onlaın rejımde de jumys isteıtin bolady. Sóıtip shalǵaıda ornalasqan aýyldarmen tikeleı baılanysqa shyǵyp, tolǵandyrǵan suraqtarǵa jaýap beredi.
О́mir ESQALI,
«Egemen Qazaqstan».
Soltústik Qazaqstan oblysy