Málim bolǵan derek boıynsha qazir Jetisý jerinde 408 218 jas urpaq ókili ósip keledi. bar. Bul oblys halqynyń úshten bir bóligin quraıdy. Demek, aımaqtaǵy jastar máselesine kóńil bólý kún tártibinen túspek emes.
Búgin Taldyqorǵan qalasynda «Jastar. Jiger. Jańǵyrý» degen atpen aımaqtaǵy Jastar jylynyń tusaýkeser rásimi ótti.
- Astanada Jastar jylyna arnalǵan aýqymdy forým ótti. Jastar jyly resmı bastaý alyp, jıynda Memleket basshysy jyl kóleminde atqarylýy tıis birqatar tapsyrmalar berdi. Bul Elbasynyń tikeleı jastardy qoldaýǵa, jastardy jańa dáýirdiń jarshysy, memleketimizdiń bolashaǵy retinde negizgi qozǵaýshy kúshi ekendigin jan-jaqty jete túsinýiniń nátıjesi deý kerek. Jalpy búgingi jastardyń bilimge, eńbekke degen qushtarlyǵy, shet tilderin meńgerýge, ınnovasııany úırenýge, jańa jobalar ázirleýge degen talpynystary meni qýantady. Elbasy bastamashy bolyp qolǵa alǵan osy bir tamasha jyldyń oıdaǵydaı, ásirese jastarymyzdyń kóńilinen shyǵatyndaı ótýi úshin atsalysý barshamyzdyń azamattyq paryzymyz dep bilemin, - dedi jıynda oblys ákimi Amandyq Batalov.
Ákim Jastar jylyna oraı «Jetisý jastarynyń jarqyn isteri» atty jumys jospary bekitilgenin aıtyp, aýdan ortalyqtarynda Jastarǵa qyzmet kórsetý ortalyqtary ashylatynyn aıtty. Sondaı-aq, «Bes áleýmettik bastama» aıasynda 2018-2019 oqý jylyna jergilikti bıýdjetten 106 grant bólingenin, jumysshy jastardy baspanamen qamtý nazarda bolatyny, ol úshin «7-20-25» memlekettik baǵdarlamasy sheńberinde sýbsıdııalaý jumystary qolǵa alynǵany da jastarmen kezdesýde jarııa boldy.
Qalmahanbet MUQAMETQALI,
«Egemen Qazaqstan»
Almaty oblysy