Elbasy Nursultan Nazarbaevtyń Qazaqstan jastaryna degen qamqorlyǵyna Táýelsizdik alǵan kezden bastap kýá bolyp kelemiz. Bul qatarda «Bolashaq», «Dıplommen – aýylǵa», «Jastar praktıkasy» men jumyspen qamtýǵa arnalǵan ózge de baǵdarlamalardy, jas otbasylardy baspanaly etýdiń túrli joldaryn kózdeıtin ózge de jobalardy aıtsaq bolady.
Al bıylǵy jyldy Jastar jyly dep jarııalaýy Memleket basshysynyń bolashaqtyń irgetasyn qalap jatqan jastardyń jaǵdaıyn jaqsartýǵa baǵyttalǵan naqty qadam dep bilemiz.
Elbasynyń qatysýymen ótken Jastar jylynyń ashylýyn tikeleı efırden tamashalaı otyryp, Qazaqstan jastarynyń ambısııalary zor, talpynysy myqty, erteńgi kúnge degen senimderi men úmitteri orasan ekenin ańǵaryp, shyn qýandym. Ásirese elimizde balamasy joq jobalar usyna kelgen jańa býyn ókilderiniń talabyna tamsandym.
Sol usynystardyń ishinde qazaqtyń saıatshylyq ónerin jahan jurtyna jarııa etip júrgen Aısholpannyń jas júreginiń «Otanym» dep eljiregeni erekshe áser etti. Al onyń «Astanada jáne basqa qalalarda qazaqtyń salt-dástúrin oqyp-úıretetin ortalyqtar, sonyń ishinde búrkitshiler mektebi ashylsa» degen tilegi kópten beri kókeıde júrgen oıdy dóp basty.
Eger mundaı mektep qurylar bolsa, onyń paıdasy mol bolar edi. Birinshiden, bul qustar ustaıtyn arnaıy pıtomnık ashýǵa múmkindik beredi. О́ıtkeni qazirgi ýaqytta bizdiń qusbegiler búrkit, qarshyǵa, lashyn sekildi ańshy qustardy daladan aýlap alýda. Biraq onyń basym bóligi Qyzyl kitapqa engen. Demek álemdik janýarlar quqyǵyn qorǵaý uıymy qazaq saıatshylaryn jaýapkershilikke tartýy múmkin. Al arnaıy qus asyraıtyn oryn bolsa, ózimizde ósirip, baýlýǵa jol ashylar edi.
Ekinshiden, mektep janynan jas natýralıster úıirmesin ashýǵa da bolady. Bir mysal aıta keteıin, jýyrda ǵana Taraz qalasyndaǵy Jeńis parkinde «Úshbulaq» jaǵalaýy paıdalanýǵa berildi. Onda jiberilgen aqqý-qazdar qalalyqtardyń kóz qýanyshyna aınaldy.
Úshinshiden, ata-babamyzdyń salt-dástúrin oqytyp, úıretetin mektepterde qazaqtyń atbegilik, qusbegilik, kúıshilik pen ánshilik syndy qundy ónerlerin bir arnaǵa toǵystyrǵan sal-serilikti de jandandyrýǵa múmkindik týar edi. Bylaısha aıtqanda, bul sekildi mektepti ashý – Jastar jylyndaǵy jarqyn jobalardyń biri bolary sózsiz.
Jalpy, qazaqta saıatshy qyzdar kóp bolǵan. Alaıda onyń birin bilsek, birin bilmeımiz. Osy rette ata ónerdi álemge tanytyp júrgen Aısholpan qyzymyzǵa alǵysymdy bildiremin. Al Jastar jyly Aısholpan sekildi armany asqaq, talaby taýdaı jastardyń maqsatyna jetýine úlken múmkindik bolady dep oılaımyn.
Japar Satylǵanov,
qusbegi, ardager
Jambyl oblysy