Basty baǵdar – baspana

Osyǵan oraı búginde Aqtóbe aımaǵynda naqty is-sharalar kesheni belgilendi. Bul istiń uıt­qysy Aqtóbe qalasynyń ákim­digi men Aqtóbe oblystyq jas­tar saıasaty máseleleri basqar­masy bolyp otyr. Bul baǵytta olar «Turǵyn úı qurylys jınaq banki» AQ-tyń fılıalymen tize qosyp, qoıan-qoltyq qyzmet jasaý josparyn belgilep, ony iske asyrýǵa kiristi. 

− Mundaǵy basty maqsat – jas­tar  men jas otbasylardyń tur­ǵyn úımen qamtylýyna qol­daý kórsetý. Sonyń ishinde tu­raq­­ty úı-jaıǵa qol jetkize al­maı júrgen jas otbasylar men jastarǵa kómek berý. Bul jó­ninde óńirde arnaıy baǵdar­lama jasaqtaldy, − dedi basqarma basshysy Nurlan Kúntýov. Jas­tar jetekshisiniń aıtýynsha, biregeı baǵdarlama 29 jasqa de­ıingi jumys isteıtin jastarǵa shapa­ǵ­a­tyn tıgize alady. Árıne bul qujattyń ózine tán sıpattary men talaptary da joq emes. So­ǵan sáıkes baǵdarlama sheń­be­rin­de baspanaǵa ıe bolýǵa tilek bil­dirgen jastyń sońǵy bes jyl­da óz atynda jeke ıeligindegi úıi bolmaý kerek. Áıtse de, jas­tar Aqtóbe qalasynda turaqty tirkelýi qajet. Taǵy bir krıterıı − jastardyń tólem qabileti men atalǵan bankte esepshotynyń bolýy. Búginde osyndaı sharttar men talaptardy ózek etken resmı hat múddeli uıymdar tarapynan oblystaǵy barlyq basqarma men departament basshylary­nyń atyna joldanǵan. Osy arqy­ly memlekettik mekemelerdiń jas­tardy turǵyn úımen qamtý jónin­degi arnaıy baǵdarlamaǵa qaty­sýyna yqpal etý tetikteri qarastyrylǵan. 

Budan keıingi kezekte bank qyzmet­kerleri úmitkerler jónin­degi derekter men málimetterdi saralap, tıisti sheshim qabyldamaq. Aqtóbe oblystyq jastar saıasaty máseleleri basqarmasynyń bas­shysy Nurlan Kúntýovtiń má­lim­deýinshe baǵdarlama aýqy­my bıylǵy Jastar jylymen ǵana shektelmeıdi. Budan keıingi kezeńde de bul is-shara yqpal etý tetigin jalǵastyra bermek. Tek bir eskerer jaıt, onyń birinshi kezeńinde jastar úshin 15 páter jasaqtaýdy josparlaǵan. Ekin­shiden, ony bıyl atalyp ótetin Aqtóbe qalasynyń 150 jyldyǵy qurmetine oraılas­tyrǵandy jón sanaıdy.

Jastarǵa arnalǵan turǵyn úı baǵdarlamasynyń tıimdiligi týraly «Turǵyn úı qurylys jınaq banki» AQ Aqtóbe oblystyq fılıaly dırektorynyń oryn­basary Raýan Baıash aıtyp ber­di. Onyń aıtýynsha, aýmaǵy 40 sharshy metr páterdi ıelengisi keletin jastardyń esepshotynda nebári 350 myń teńge bolsa jetkilikti. Tıisinshe bul kólem 55 sharshy metr bolatyn bolsa, esepshottaǵy soma 450 myń teńge bolsa jetip jatyr. Bul rette aı saıynǵy tólemaqy 35 myń teńge turatyny da jas­tar úshin tıimdi ekeni anyq. Ar­naıy baǵdarlama sheńberinde usy­­­ny­latyn páterler oblys or­ta­­lyǵyndaǵy «NurAqtóbe» turǵyn-úı kesheninde ornalasqan. 

Jastarǵa arnalǵan úı-jaı máselelerin retteýde ilkimdilik tanytyp otyrǵan aqtóbelik jas­tar uıymynyń bastamasy bar­lyq óńirge úlgi bolsa ıgi. 

Temir QUSAIYN,

«Egemen Qazaqstan» 

AQTО́BE