Astana qalasyn zertteý nátıjeleri boıynsha elordanyń jetilý deńgeıi - 2.48 baldy qurady. Bul týraly ákimdikte ótken apparat otyrysynda Investısııalar jáne kásipkerlikti damytý basqarmasynyń basshysy Álisher Ábdiqadyrov aıtty, dep habarlaıdy Elorda Info.
«Bizdiń basqarma IDC (International Data Corporation) agenttigimen birlesip, Astana qalasy ákimdiginiń salalyq basqarmalaryn ekonomıka, kólik, qorshaǵan orta, qaýipsizdik jáne sıfrlandyrý máseleleri boıynsha zertteý jumystaryn júrgizdi. Osy jumystyń qorytyndysy boıynsha, Astana qalasy «aqyldy» qalalardyń halyqaralyq reıtıngine engizildi. Astana qalasyn zertteý nátıjeleri boıynsha elordamyzdyń jetilý deńgeıi - 2.48 baldy qurady», - dedi ol.
Basqarma basshysy álemniń keıbir qalalarynyń jetilý deńgeıi: Sıngapýr - 4.4, Nıý-Iork - 3.7, Dýbaı – 3.6, Barselona - 3.2, Máskeý - 3.1 ekenin atap ótti.
«Sonymen qatar, Astana qalasy Ortalyq Azııada osy úlgi boıynsha zerttelgen jáne Smart City kemel baǵasyn alǵan alǵashqy qala boldy», - dep túıindedi sózin Ábdiqadyrov.