Reseıdiń Orynbor ólkesinde týyp-ósken qandasymyz Damır Ismaǵulov bul kúnderi UFC-degi óziniń ekinshi jekpe-jegine qyzý daıarlanýda. Ol 23 aqpanda Chehııanyń bas shahary – Pragada ıspandyq Hoel Alvarespen aıqasady.
Pıreneı túbeginiń túlegi óte myqty sportshy. Osy kúnge deıin 16 ret aıqas alańyna shyqqan 25 jastaǵy Alvares 15 márte jeńiske jetip, barlyq básekeni merziminen buryn aıaqtady. Al Damır bolsa, 19 báseke ótkizip, 17 ret basymdyq tanytty. Kezinde ol M-1 Global nusqasy boıynsha chempıondyq belbeýdi ıelendi. Sodan keıin álemdegi eń beldi pormoýshen – UFC-ge aýysty. Byltyrǵy jyldyń jeltoqsan aıynda Avstralııanyń Adelaıda qalasynda jergilikti sportshy Aleks Gordjesti upaı sanymen utty.
Ispanııa sportshysy «qylqyndyrý» ádisin óte sheber oryndaıdy. 15 básekeniń barlyǵyn aıqyn basymdyqpen aıaqtaǵan bul jigitti myqty dep aıtpasqa laj joq. Biraq men odan esh qaımyqpaımyn. Pragada ótetin jekpe-jekte óz jankúıerlerimdi qýantý úshin barymdy salamyn, – deıdi Damır Ismaǵulov.
Ǵalym SÚLEIMEN,
«Egemen Qazaqstan»