Bul kúnderi Qurlyqtyq hokkeı lıgasynda (QHL) «Barystyń» sapynda óner kórsetip júrgen 25 jastaǵy kanadalyq legıoner Darren Dıs Máskeýdiń SSKA klýbynyń shabýylshysy Kırıll Kaprızovpen birge jeńis goldaryn soqqan oıynshylardyń kóshin bastap tur.
Aıtýly oıynshylardyń árqaısysy segiz retten mańyzdy shaıbalardy qaqpaǵa engizgen eken. Turaqty birinshilik aıaqtalǵanǵa deıin «Barys» áli 10 kezdesý ótkizedi. Atap aıtsaq, jerlesterimiz Novosibirdiń "Sıbıri» (29 qańtar, qonaqta), Sankt-Peterbýrgtiń SKA-sy (31 qańtar, úıde), Fınlıandııanyń «Iokerıti» (2 aqpan, úıde), Ýfanyń «Salavat Iýlaevy» (4 aqpan, qonaqta), Novosibirdiń "Sıbıri» (12 aqpan, úıde), Qytaıdyń «Kýnlýni» (14 aqpan, úıde), Ombynyń «Avangardy» (16 aqpan, úıde), Vladıvostoktyń «Admıraly» (18 aqpan, qonaqta), Habarovskiniń «Amýry» (20 aqpan, qonaqta) jáne Qytaıdyń «Kýnlýn» (22 aqpan, qonaqta) klýbtaryna qarsy oınaıdy. Al máskeýlikterdiń bizden bir oıyny artyq. Eger osy oıyndarda Darren Dıs shabysynan jańylmasa, onda osy atalym boıynsha ol jeńimpaz atanady. Osy oraıda, olardy Naıdjel Doýs («Avtomobılıst») pen Aleksandr Semın («Vıtıaz») ókshelep kele jatqanyn aıta ketýge tıispiz. Olar jeti retten jeńis shaıbasyn soqty.
Sonymen qatar, Darren Dıs QHL-daǵy eń kóp soqqy jasaǵan oıynshylardyń kóshin bastap tur. Astanalyq hokkeıshi qarsylastar qaqpasyna 210 soqqy baǵyttaǵan eken. Odan keıingi oryndarda myna oıynshylar: Iýýso Pýýstınen («Neftehımık») – 192 soqqy, Andreı Kýteıkın («Spartak») – 190 soqqy, Aleks Grant («Iokerıt») – 187 soqqy jáne Ilıa Mıheev («Avangard») – 177 soqqy.
Ǵalym SÚLEIMEN,
«Egemen Qazaqstan»