Forým jastarǵa arnalǵan «Zhas Project» jobasyn júzege asyrý jáne damytý jóninde jyl táýliginde atqarylǵan jumystardy qorytyndylady. Joba arqyly jyl boıy jastardyń bastamalary men olardy júzege asyrýdyń tamasha úlgileri kórindi, júzege asty. Oblys boıynsha ótken jyly jobaǵa qatysýǵa 394 ótinish berildi. Búgingi málimet boıynsha, oblys aýdandary men qalalarynda 464 jas 230 mıllıon teńgeden astam qarjyǵa 11 baǵyt boıynsha 137 jobany júzege asyrǵan.
Forým aldynda «Zhas Project» jobasyna qatysqandardyń kórmesi uıymdastyryldy. Onda osy jobaǵa qatysýshylardyń jumystary kórindi. Túrli salada jastar qolynan is keletinin kórsete bilipti. Jobaǵa qatysyp alǵan bir mıllıon teńgege is bastalǵan.
«Osy isterińdi toqtatpaýǵa, ári qaraı damytýǵa shaqyramyn. Bıznesti damytýǵa ekonomıkanyń túrli salasynda memlekettik baǵdarlamalar bar. Elbasy aıtqandaı, ýaqyt bir ornynda turǵan joq, sonshalyqty jyldamdyqpen qoǵam damyp, ómir ózgerip barady. Tek kásipkerler ǵana emes, alǵa umtylǵan barlyq adamdar ýaqyt yrǵaǵyna ilese bilýi tıis. Jastar jyly árkim óz áleýetin kórsetý, ıgilikti isterin júzege asyrý úshin olarǵa barlyq qamqorlyq, qoldaý jasalady. Sony ýaqytyly, utymdy paıdalana bilýlerińiz kerek. Bilim alýǵa, baspanaly bolýǵa, otbasyn qurýǵa, jumys tabýǵa umtylǵan jasqa múmkindiktiń barlyǵy qarastyrylǵan» dedi jastardyń aımaqtyq forýmyna qatysqan oblys ákiminiń orynbasary Marat Júndibaev.
Lısakov qalasynda turatyn Aıǵanys О́nerbekova «Zhas Project» jobasynyń granty arqyly «О́ner» stýdııasyn quryp, bir úıdegi aǵasyn, ózin, inisin, sińilisin jumyspen qamtydy. Olar qalalyqtardy otbasylyq merekelirnde kásibı sýretke, beınetaspaǵa túsirip, toıǵa daıyndap qyzmet kórsetedi. Aıǵanys osy bıznes túrin aldaǵy ýaqytta keńeıte túsetinin aıtty. Jobaǵa qatysqan ár jastyń isi qyzy ári jurtshylyqqa kerek qyzmet túri der edik. Bir Meńdiǵara aýdanynyń ózinde 11 joba júzege asyp, 34 jas jumyspen qamtamasyz etilgen, al Qamysty aýdanynda 10 joba júzege asqan. Alty aıdyń ishinde olarǵa 124 mıllıon teńge grant berilgen. Qazir oblysta osy jobany jastarǵa túsindirý, oıyndaǵy bastamasyn qalaı iske asyrýdyń joldary jóninde tálimgerlik oqytý jumystary júrgiziledi. Oblysta 20 tálimger iriktelip alyndy, olardyń arasynda oqytýshylar, úkimettik emes uıymdarda tájirıbesi mol adamdar, bıznes ókilderi bar.
«Bizdiń maqsatymyz jastarǵa óziniń bolashaǵyna senimdilik qalyptastyrý, oılaryn júzege asyrýyna tájirıbe berý bolyp tabylady. Forýmǵa qýatty ınvestorlardy jáne jastar kásipkerligin qoldaıtyn memlekettik organdar ókilderin shaqyrdyq. Árbir jas óziniń oıyndaǵy maqsatyn erteńge qadyrmaı, der ýaqytynda júzege asyrýǵa talaptanýy qajet. Jastar jyly oǵan múmkindik beredi, sony túsinip, belsendilik tanytýy qajet» deıdi «Zhas Project» jobasynyń aımaqtyq úılestirýshisi Erlan Tóletaev.
Forýmǵa Astana qalalyq jastardy damytý korpýsy jobasynyń granttar boıynsha úılestirý agenttiginiń mamany Inara Káribaeva qatysyp, oblystaǵy jaqsy iske kýá bolǵanyn aıtty jáne jastarǵa tabys tiledi.
Názıra Járimbet,
«Egemen Qazaqstan»
Qostanaı