Úkili Ybyraı atyndaǵy Aqmola oblystyq fılormonııasynda ótkizilgen «Saǵyndyrǵan ánder-aı» án keshi tyńdarman qaýymǵa rýhanı olja salǵan áserli shara boldy.
Bıylǵy dýman óńirdegi 15-ke jýyq kúmis kómeı sańlaqtar men sahna tórine endi qadam basyp kele jatqan jas ónerpazdardyń basyn biriktirdi. Olar án óneriniń negizin mármárdan qalap, esimderi altyn árippen jazylǵan Shámshi Qaldaıaqov, Áset Beıseýov, Nurǵısa Tilendıevterdiń ánderin oryndap qalyń kópshiliktiń kóńilin jadyratty.
Ulttyq ónerge shólirkep qalǵan Kókshe jurty sahna tórindegi óńir ánshileriniń ónerlerine tánti bolyp, ár ándi birge qosylyp shyrqady. Shara Kenjebek Kúmisbekov atyndaǵy qazaq halyq aspaptar orkestriniń súımeldeýimen ótken keshtiń shymyldyǵy Shámshi Qaldaıaqovtyń «Kógildir Kókshe» ánimen túrildi.
– Biz búgingi sharany ádeıi demalys kúnine qoıyp otyrmyz. Sebebi turaqty kórermenderimiz aptanyń ortasynda jumystaryna baılanysty sharaǵa kele almaı jatady,–deıdi Úkili Ybyraı atyndaǵy Aqmola oblystyq fılarmonııasy dırektorynyń orynbasary Jumagúl Qaıymova.
Taza, jandy daýysta ótken atalmysh keshke ónerpazdar eki aı daıyndyq júrgizgen eken. Tyńǵylyqty daıyndyqtyń arqasynda usynylǵan konserttik baǵdarlama halyq kóńilinen shyqty. О́nerpazdardyń arasynda eldiń erkesine aınalyp, ózindik sara jolyn qalyptastyryp júrgen ánshiler de bar.
–Bul keshti halyq asyǵa kútedi. Bizdiń basty maqsatymyz keshegi aǵa-apalarymyzdyń ánderin búgingi jastarǵa nasıhattaý. Sondaı-aq bizdiń ujymdaǵy jas ónerpazdar osyndaı konserter arqyly shyńdalady,–deıdi Qazaqstan Respýblıkasynyń eńbek sińirgen ártisi Ǵazıza Jumekenova.
Konsertte 60-80-shi jyldar aralyǵyndaǵy ásem ánder shyrqalyp, kózi qaraqty kórermen qaýym birer sát sol dáýirge saıahat jasap qaıtty. Oryndaýshylar tek qana ándi áserli jetkizip qoımaı, sol kezeńdegi kıim úlgisin de eske saldy.
–Búgin men balalyq shaǵymdaǵy ásem ánderdi tyńdap bir jasap qaldym. Keshti óte jaqsy uıymdastyrǵan. Myń jyl ótse de óz máni men maǵynasyn joımatyn osyndaı ǵumyrly ánder ǵoı,–deıdi kórermen Dárııa Nııazbekova.
Úkili Ybyraı atyndaǵy án óneriniń qazynaly qara shańyraǵy ár aı saıyn jańa konserttik baǵdarlama daıyndap, tyńdarmandaryn qýantýdan jalyqqan emes. Oǵan dálel 2018 jyly 224 konsert ótkizip, 38 myńǵa jýyq kórermenge qyzmet kórsetken eken. Bıyl da birqatar tyń jobalar qolǵa alynýda.
Baıqal BAIÁDIL,
«Egemen Qazaqstan»
Aqmola oblysy