Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń bastamasymen «Sıfrlyq agent» (Digital agent) mobıldi qosymshasynyń iske qosylǵanyna kóp ýaqyt óte qoıǵan joq.
Mańǵystaýda sońǵy 2 aıda 371 adam kórsetiletin memlekettik qyzmet túrlerine oń baǵa bergen. Atalǵan mobıldi qosymshanyń ereksheligi qyzmet alýshy memlekettik kórsetiletin qyzmettiń sapasyn shynaıy ýaqyt rejıminde baǵalaı alady.
Ol úshin «Play Market» jáne «App Store» servıstik baǵdarlamalary arqyly mobıldi qosymshany júktep, ornatylǵannan keıin tirkeýden ótý qajet. Sodan soń, baǵalaıtyn qala men mekemeni tańdaıdy. Baǵalaý joldanǵannan keıin Agenttiktiń tıisti aýmaqtyq bólimsheleriniń jaýapty tulǵalary óz quzyreti sheginde áreket etedi.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamentiniń memlekettik kórsetiletin qyzmetter basqarmasynyń jetekshi mamany Taǵan Sarıevtyń aıtýynsha, qazirgi ýaqytta qyzmet alýshylar Halyqqa qyzmet kórsetý boıynsha bólimderdiń, qala jáne aýdandyq memlekettik kirister basqarmalarynyń, sondaı-aq, eńbek, áleýmettik qorǵaý jáne kóshi-qon komıtetiniń departamentimen kórsetiletin memlekettik qyzmetterdiń sapasyn baǵalaı alady.
-Máselen, qyzmet alýshyǵa personal dórelkilik tanytýy múmkin nemese kezekte uzaq turyp qalýyńyz ǵajap emes, sonymen qatar múmkindigi shekteýli jandarǵa jaǵdaı jasalmaǵan bolsa jáne taǵy basqa máseleler boıynsha ýákiletti organdardy habardar etip, máseleni 5 mınýtta sheshý múmkindigi bar. Osylaısha árbir azamat kórsetilgen memlekettik qyzmetter boıynsha keri baılanys ornata otyryp, Agenttiktiń kómegimen máselesin sheshýge múmkindik alyp otyr. Barlyq azamattardy memlekettik kórsetiletin qyzmetterdi baǵalaýdy jáne atalǵan qosymshany qoldanýǵa shaqyramyz, deıdi ol.
Gúlaıym ShYNTEMIRQYZY,
«Egemen Qazagstan»
Mańǵystaý oblysy