Qurlyqtyq hokkeı lıgasynyń (QHL) kezekti týr oıynyn Novosibirde ótkizgen «Barys» jergilikti «Sıbırden» qosymsha ýaqytta utyldy.
Birinshi kezeńde qos komanda bir-biriniń qaqpa kiltin taba almady. Kórermender tek 33 mınýtta alǵashqy goldyń kýási boldy. Qonaqtardyń sál kibirtiktep qalǵanyn utymdy paıdalanǵan Djordan Keron aıdyn ıelerin alǵa shyǵardy. Úshinshi kezeńniń bel ortasynda Maksım Semıonov tarazy basyn teńestirdi. Osylaısha, oıyn overtaımǵa ulasty. Qosymsha ýaqytta Jılber Brıýle soqqan shaıba «Sıbırge» jeńis syılady. Esep – 2:1. Áıteýir, kóńilge bir medet bolatyny Novosibir saparynan astanalyq hokkeıshiler bir upaımen oraldy.
QHL-tyń turaqty birinshiliginde «Barys» altynshy orynda keledi. 53 kezdesýden keıin jerlesterimiz 75 upaı jıdy. Aldymyzda turǵan taǵy eki komandanyń da jıǵan upaı qory dál sondaı. Alaıda «Avangardtyń» (Omby) bizden tórt jáne «Lokomotıvtiń» bir oıyny artyq. Sol sebepti de olardy basyp ozý úshin bizdiń jigitterdiń múmkindigi mol.
«Barys» aldaǵy kúnderi myna komandalarǵa qarsy oınaıdy: Sankt-Peterbýrgtiń SKA-sy (31 qańtar, úıde), Fınlıandııanyń «Iokerıti» (2 aqpan, úıde), Ýfanyń «Salavat Iýlaevy» (4 aqpan, qonaqta), Novosibirdiń "Sıbıri» (12 aqpan, úıde), Qytaıdyń «Kýnlýni» (14 aqpan, úıde), Ombynyń «Avangardy» (16 aqpan, úıde), Vladıvostoktyń «Admıraly» (18 aqpan, qonaqta), Habarovskiniń «Amýry» (20 aqpan, qonaqta) jáne Qytaıdyń «Kýnlýni» (22 aqpan, qonaqta).
Ǵalym SÚLEIMEN,
«Egemen Qazaqstan»