Búgin Biryńǵaı jınaqtaýshy zeınetaqy qorynyń resmı saıtynda zeınetaqy aktıvterin basqarý jónindegi ınvestısııalyq portfel týraly tolyq aqparatta jarııalanǵan. Bul málimettermen tómendegi silteme arqyly https://www.enpf.kz/upload/medialibrary/ac8/ac85aa8ed8f69cc9359bad2d21d7fae7.pdf tanysýǵa bolady.
Investısııalyq qyzmet týraly tolyq esep salymshylardyń zeınetaqy jınaqtary qandaı jáne qansha mólsherdegi baǵaly qaǵazdarǵa, qandaı naryqtyq baǵa boıynsha ınvestısııalanatyny jaıyndaǵy maǵlumattardan turady.
2019 jyldyń 1 qańtaryndaǵy jaǵdaı boıynsha Qazaqstan Respýblıkasy Ulttyq Bankiniń senimgerlikpen basqarýyndaǵy BJZQ AQ zeınetaqy aktıvteri 9 378,03 mlrd teńgeni qurap,bir jylda 1 603,21 mlrd teńgege ıaǵnı, 20,62 paıyzǵa ósti.
Biryńǵaı jınaqtaýshy zeınetaqy qory (budan ári – BJZQ, Qor) salymshylarynyń jeke zeınetaqy shottaryna eseptelgen taza ınvestısııalyq tabys somasy 2018 jyly 917,1 mlrd teńgeni qurady. Qordyń zeınetaqy aktıvteri boıynsha ınvestısııalyq tabystylyǵynyń mólsheri 2018 jyly 11,27 paıyzdy qurasa, bul kezdegi ınflıasııa 5,3 paıyzdy kórsetti. Osylaısha zeınetaqy aktıvteri boıynsha naqty tabystylyq 2018 jyly 5,97 paıyz boldy.
Qordyń zeınetaqy aktıvteri portfeliniń negizgi bóligi Qazaqstan Respýblıkasynyń memlekettik qundy qaǵazdaryna (43,27 paıyz) tıesili. Eseptik kúnge deıin teńgede nomınaldanǵan memlekettik qundy qaǵazdar boıynsha óteýge qatysty ortasha tabystylyq jylyna 6,9 paıyzdy, al AQSh dollarynda jylyna 4,4 paıyzdy qurady.
Elimizdiń kvazımemlekettik uıymdarynyń oblıgasııalary zeınetaqy aktıvteriniń ınvestısııalyq portfeliniń 13,86 paıyzyna jetken. 2019 jyldyń 1 qańtaryna deıin teńgede nomınaldanǵan QR kvazımemlekettik uıymdarynyń oblıgasııalary boıynsha óteýge qatysty ortasha tabystylyq jyldyq 10,3 paıyzdy, al AQSh dollaryna – jyldyq 5,0 paıyzdy qurady.
2019 jyldyń 1 qańtaryna qaraı zeınetaqy aktıvteri portfelindegi depozıtter úlesi 2,9 paıyzdy qurap, olardyń óteýge qatysty ortasha tabystylyǵy jyldyq 9,6 paıyzdy kórsetti.
2019 jyldyń 1 qańtaryna qaraı QR ekinshi deńgeıdegi bankteriniń oblıgasııalary zeınetaqy aktıvteri portfeliniń 13,5 paıyzyn qurady. Teńgede nomınaldanǵan oblıgasııalardy óteýge qatysty ortasha tabystylyq jyldyq 10 paıyzdy, al AQSh dollarynda jyldyq 6,6 paıyzdy kórsetti.
2019 jyldyń 1 qańtaryna qaraı shetelderdiń memlekettik qundy qaǵazdaryna shetel valıýtasynda nomınaldanǵan ınvestısııalar úlesi 12,7 paıyzdy qurap, óteýge qatysty ortasha tabystylyq jyldyq 3,9 paıyzdy kórsetti.
Qordyń zeınetaqy aktıvteri esebinen satyp alynǵan qarjy quraldary nomınaldanǵan valıýta boıynsha qarjy quraldarynyń ınvestısııalyq portfeli bylaısha keltirilgen; qundy qaǵazdardyń 67,2 paıyzy ulttyq valıýtada ınvestısııalanǵan, AQSh dollarynda – 32,37 paıyz , ózge valıýtalarda – 0,4 paıyz. Senimgerlikpen basqarýdaǵy BJZQ zeınetaqy aktıvteriniń qurylymdyq bólýi BJZQ-nyń Investısııalyq deklarasııasynyń talaptaryna sáıkes keledi.
Aınash ESALI,
«Egemen Qazaqstan»
ALMATY