Akademık Serik Qırabaev el gazeti «Egemen Qazaqstanda» jarııalanǵan «Baıandy baqyt» atty maqalasynda: «Kúni búginge deıin otyz tom kóleminde kórkem shyǵarma jazyp, jaryqqa shyǵarǵan Sábıt shyǵarmashylyǵy bizdiń ulttyq ádebıetimizdiń baǵaly úlgileriniń biri» dep jazǵan-dy. Aǵa synshynyń sózinen bastaý alǵan Sábıt Dosanovtyń Almatydaǵy shyǵarmashylyq keshi taǵylymy mol asa tartymdy kesh boldy.
Kesh shymyldyǵy Memlekettik hatshy Gúlshara Ábdiqalyqovanyń quttyqtaý hatymen ashyldy. Birinshi bolyp sóz alǵan memleket jáne qoǵam qaıratkeri, Qazaqstannyń Eńbek Eri Oljas Súleımenov qalamdas dosyn kúni keshe jazyp bitirgen jańa shyǵarmasymen quttyqtady.
Alystan at arytyp kelgen Ázerbaıjan jazýshysy Elhan Zal Karahan S.Dosanovtyń ázerbaıjan tilinde jaryq kórgen tańdamaly shyǵarmalar jınaǵynyń bir tomdyǵyn tartý etip, Ázerbaıjanda qazaq qalamgeriniń aldaǵy jyly 80 jasqa tolatyn mereıtoıyna ázirlik bastalyp ketkenin habarlady. Túrkııalyqtar sálemin Elchın, qyrǵyz baýyrlardyń ystyq yqylasyn Marhabaı Aamatov, ózbek týysqandar qurmetin jazýshy Mehmonqul Islamqulov pen О́zbekstannyń bas konsýly Abror Fatýlaev, ózbek teatrynyń dırektory Ikram Hoshımjanov, jazýshynyń týǵan óńiri qostanaılyqtar quttyqtaýyn oblys ákimi Arhımed Muhambetov pen Amankeldi aýdanynyń ákimi Ámirhan Asanov atynan oblys ákimdiginiń bólim meńgerýshisi Arman Ádenov jetkizdi. Almaty qalasynyń ákimi Baýyrjan Baıbektiń sálemin qala ákiminiń orynbasary Sultanbek Mákejanov, Ońtústik Qazaqstan halqynyń aqjarma aq tilegin Naýryz-Áli Orazymbetov, Jambyl oblysy jurtshylyǵy ystyq yqylasyn Temirhan Áımenov bildirdi. Kesh ıesin Júrgenov atyndaǵy óner akademııasynyń rektory Ashat Maemırov, Memlekettik syılyqtyń laýreaty О́tegen Oralbaıuly, t.b. quttyqtady. Aqyndar Myńbaı Rásh, Qazybek Isa, zeınetker ustaz Faıma Tórebekova arnaý óleńderin oqydy.
Qazaqstannyń eńbek sińirgen qaıratkeri Merýert Túsipbaeva, ánshi, Ǵabıt Músirepov atyndaǵy teatrdyń aktrısasy Araı Bolatqyzy, ánshiler Ǵalymjan Ábdibekov, О́ktem Altaev áserli keshti ásem ánmen árledi.
Bul ádebı kesh qalamgerdi madaqtaýmen emes ádebıet, óner jaıly syrlasyp, ómirdiń ózekti máseleleri jaıly oı órbitýmen, táýelsizdik týraly tolymdy oı tolǵaýmen erekshelendi.