Qostanaı oblysyndaǵy Altynsarın aýdanynyń ákimi Erlan Jamanov turǵyndar aldynda esep berdi. Esepti jylda aýdannyń ekonomıkalyq-áleýmettik damýy joǵary alǵa jyljyp otyrǵan. Aýyl sharýashylyǵynda jalpy ónim 17 mlrd 10 mıllıon teńgeni quraǵan. Mal basy da kóbeıgen. Aýyl sharýashylyǵy taýarlaryn óndirýshiler egin sharýashylyǵynda 347 mıllıon, mal sharýashylyǵynda 25 mıllıon teńge sýbsıdııa alǵan, sonymen qatar ınvestısııalyq sýbsıdııa 250 mıllıon 500 myń teńgeni quraǵan. Elbasy tapsyrmasyna oraı, aýdan kóleminde týrızmdi damytý jumystary da júrip jatyr. Munda týrızmniń ańshylyq, balyq aýlaý jáne saýyqtyrý-demalys baǵyttary damyp keledi.
Degenmen, aýdannyń áleýmettik ómirinde ınfraqurylym mańyzy ózekti kúıinshe qalyp otyr. Bul oraıda sońǵy jyldary aýdan basshylyǵy aýyz sý máselesine barynsha kóńil bólgen. Aýdandaǵy barlyq eldi mekenniń 9-y ortalyq aýyz sý qubyrymen qamtamasyz etilgen. Aýyz sý máselesiniń sheshimin tabýy úshin byltyr 4 joba boıynsha jobalyq-smetalyq qujattama daıyndaldy. Bıyl Dokýchaev, Shoqaı, Novoalekseevka, Krasnyı kardon jáne Sataı aýyldaryna basty sý qubyry jáne sý taratý qubyrynyń jelileri qurylysy bastalady. Oǵan respýblıkalyq bıýdjetten 2 mıllıard 284 mıllıon 397 myń teńge qarjy bólindi.
«Munyń barlyǵy oblys ákimi Arhımed Muhambetov jáne Parlament Májilisiniń depýtaty Irına Aronovanyń arqasynda múmkin boldy. Biz olardyń aýyl turǵyndarynyń jaǵdaıyna bıik adamgershilik turǵydan túsinistikpen qaraǵanyna alǵysymyzdy aıtamyz. Aýyldy sýmen qamtamasyz etý osylaı respýblıkalyq jáne oblystyq dárejede jedel sheshimin tapty» dedi aýdan ákimi Erlan Jamanov.
Sonymen qatar, aýdandy gazdandyrý jáne aýdandaǵy, aýyldardaǵy joldardy jóndeýge de respýblıkalyq bıýdjetten qarjy bólindi. Bıyl aýyldardyń eńsesin kóterý úshin osylaı ınfraqurylymdyq jumystar qarqyndy júretin bolady.
Názıra Járimbet,
«Egemen Qazaqstan»
Qostanaı