Ár mahabbat oqıǵasy ózinshe erekshe. Keıde boıjetken men bozbalanyń qarapaıym tanystyǵy asa tereń sezimge aınalýy múmkin. Jastar jylynyń basynda osyndaı qarapaıym oqıǵa Aıdar men Aınagúl Súleımenovtardyń shańyraq kóterýimen aıaqtaldy. Jas jubaılar óz armandaryn júzege asyrýǵa múmkindik bergen Astanada tanysqan bolatyn. Bul týraly elorda ákimdiginiń resmı saıty habarlady.
Aıdar men Aınagúl 2017 jyly tanysqan. Kúıeý jigit «EKSPO» kórmesinde jumys istese, qalyńdyq halyqaralyq ekspozısııany tamashalýǵa kelgen. Alaıda sol kezde kórmede kórisý eki jasqa buıyrmapty. Jarty jyl ótken soń Aıdar men Aınagúl áleýmettik jelilerdiń birinde hat almasyp, bir úıde turatyn kórshi ekenderin bilgen. Aıdar olardyń shańyraq qurýy mańdaılaryna jazylǵanyn aıtady. Úılený toıynyń aldynda kúıeý jigit Memleket basshysynyń batasyn alýdy jón kórgen eken. Qańtarda jas jigit Aqordaǵa elektrondy hat joldap, úılený toıyna Qazaqstan Prezıdentin shaqyrǵan.
«Bul bastapqyda meniń ıdeıam boldy. Bul kúnniń máńgige este qalǵanyn qalaımyn. Birinshiden, ekeýmizdiń de ákemizdiń kózi tiri emes. Sol sebepti Uly adamdardyń batasyn alsaq, nur ústine nur bolar edi degen oı keldi. Bul biz úshin óte mańyzdy. Sebebi biz Qazaqstannyń turǵyndary emespiz be?! Kez kelgen jaǵdaıda adamdarǵa jaqsylyq tileseń, ózińe eselep qaıtady. Onyń ústine, elimizde «Jastar jyly» bastaldy. Munyń bári taǵdyr ispetti. Ártúrli qalalardan kelsek te, bizdi Astana baılanystyrdy. Kezdestik, otbasyn qurýdamyz, men buǵan óte qýanyshtymyn, Elordada ómir súrip jatqanyma baqyttymyn», – dedi Aıdar Súleımenov.
Astana ákimi Baqyt Sultanov jas jubaılarǵa Qazaqstan Prezıdenti Nursultan Nazarbaevtyń quttyqtaý hatyn tabystady. Ákimniń aıtýyna qaraǵanda, Elbasy jas jubaılardyń shaqyrý hatyn ystyq yqylaspen qabyl alyp, Aıdar men Aınagúl Súleımenovtardy otbasylyq ómirge qadam basýlarymen quttyqtady. Sondaı-aq, Memleket basshysy qos ǵashyqqa zor densaýlyq, baqyt pen jarqyn bolashaq tiledi.
«Elbasy jáne Astana turǵyndarynyń atynan Sizderdi shyn júrekten neke qııý kúnimen quttyqtaımyn! Osy jyldy Memleket basshysy Jastar jyly dep jarııalaǵanyn bilesizder. Bul – Sizder sııaqty azamattarǵa degen artylǵan úlken úmit, berilgen orasan múmkindik. Osyǵan oraı, Astanada jastardyń áleýmettik jaǵdaıyn kóterý, densaýlyǵyn saqtaý, shyǵarmashylyq bastaýlaryn qoldaý boıynsha kóp jumystar jasalady. Meniń bilýimshe, Aıdar Qaraǵandy oblysynan, al Aınagúl Aqmola oblysynan Astanaǵa keldińizder. Sizderdi tabystyrǵan – elordamyzda ótken «EKSPO-2017» kórmesi. «EKSPO» – Elbasymyzdyń strategııalyq jobasynyń biri. О́zderiń de kórdińder, kórmeniń bergen áseri de, jańalyǵy da óte kóp. Elordamyzdy jastardyń armany oryndalyp, mahabbatyna qol jetkizetin meken dep ataýǵa bolady. Sondyqtan sizge mahabbat, tatýlyq pen kelisim tileımin!», – dedi Baqyt Sultanov.