Qurlyqtyq hokkeı lıgasynyń kezekti týrynda «Barys» klýby «Iokerıtti» 8-2 esebimen tize búktirdi.
Matchtaǵy alǵashqy shaıbany «Iokerıt» oıynshylary soqty. Kezdesýdiń 8 mınýtynda Sakarı Mannınen mergendigimen tanylǵan. Alaıda kóp uzamaı «Barys» hokkeıshileri esepti teńestirdi. Qarymta shabýylda Álıhan Ásetov qarsylas qaqpashysyn qapy qaldyrdy.
Oıynnyń ekinshi kezeńinde Brendon Bochenskı astanalyqtardy alǵa shyǵarǵan. Alaıda Pıter Regın tarazy basyn teńestirdi. Biraq ekinshi taım aıaqtalar tusta Andre Petersson esepti 3-2-ge jetkizdi.
Úshinshi kezeń elordalyqtardyń benefısine aınaldy. «Barys» hokkeıshileri qarsylas qaqpasyna jaýapsyz 5 shaıba soqty. Áýeli Roman Starchenko mergendik tanytsa, keıinnen Andre Petersson, Nıkıta Mıhaılıs, Egor Petýhov, Mettıý Frettın qanjyǵasyn maılady.
Osylaısha, «Barys» oıynshylary QHL-dyń besinshi satysyna kóterildi. Al Shyǵys konferensııasy boıynsha astanalyqtar ekinshi orynǵa jaıǵasty.
«Barys» pen «Iokerıt» buǵan deıin 8 márte kezdesken bolatyn. Sonyń beseýinde elordalyqtar jeńiske bastar joldy jazbaı tapsa, úsh oıynda «Iokerıttiń» asyǵy alshysynan tústi.