Kópten beri halyq arasynda aıtylyp kele jatqan qymbatshylyq týraly áńgime búgin rasqa shyqty. Taraz qalasynda as atasy 5 teńgege qymbattap, búginnen bastap barlyq jerde 70 teńgeden satylýda. Al on aýdany bar Jambyl oblysynyń Moıynqum aýdanynda ǵana nan baǵasy 80 teńgege deıin jetip otyr.
Moıynqum aýdany oblys ortalyǵynan úsh júz shaqyrymnan astam qashyqtyqta ornalasqan. Sonymen qatar, munda naýbaıhana sany da az. Bul máselege jaýapty shendiler nan baǵasynyń on teńgege deıin qymbattaýyn osyndaı máselelermen baılanystyryp otyr. Tipti, ótken jyly kúzde naýbaıshylar bıdaı men unnyń baǵasynyń da óskendigin eskere otyryp, as atasyn qymbattatý úshin aýdan ákimine hat ta jazǵan eken. Nátıjesinde Jambyl oblystyq turaqtandyrý qorynan 500 tonnadan asa unnyń kelisi arzandatylǵan 70 teńgeden nan shyǵarýshy nysandarǵa berilip otyrǵan. Endi aǵymdaǵy jyly qańtar aıynyń sońynda qordaǵy un da taýsylǵan. Sondyqtan da nan baǵasyn birqalypty ustap turý múmkin bolmaı otyrǵan kórinedi.
Jambyl oblystyq aýyl sharýashylyǵy basqarmasynyń basshysy Berik Nyǵmashevtiń aıtýynsha, naýbaıhana ıeleri baǵany birden 10 teńgege kóterýdi surapty. Alaıda, oblys ákimi Asqar Myrzahmetov nan baǵasyn tek 5 teńgege ǵana kóterýge ruqsat bergen. «Búginnen bastap nan baǵasy bes teńgege kóterildi. Qazirgi kúni naryqtyq baǵada elimizdiń soltústik óńirlerinde bıdaı 75-80 teńgeden bolyp otyr. Jambyl oblysy bıdaıdyń 70 paıyzdan astam kólemin sol soltústik óńirlerden ákeledi. Biraq, ol kezde unnyń baǵasy 70-80 teńge bolatyn bolsa, búgingi tańda unnyń baǵasy 90 teńgege jetip qaldy», deıdi basqarma basshysy.
О́tken jyldyń qarasha aıynda qarjylaı qıyndyqqa shydaı almaǵan naýbaıshylar nan baǵasyn negizsiz 10 teńgege kótergen bolatyn. Barlyq kásipkerdiń kásibinen paıda tapqysy keletini ras, árıne. О́nimdi halyqqa jetkizý úshin ketetin shyǵyn taǵy bar. Deı turǵanmen, qymbattaýǵa baılanysty halyqtyń qarsylyǵynyń nátıjesinde ǵana as atasynyń baǵasy bastapqy qalpyna kelgen edi.
Búgingi tańda Taraz qalasynda eldi nanmen qamtyp otyrǵan 8 naýbaıhana bar. Naýbaıshylar 400 myńǵa jýyq turǵyny bar tarazdyqtar úshin táýligine 90 myń bólke nan pisiredi. Bul rette kún saıyn 50-55 tonna un jumsalady eken. Aıta keteıik, Jambyl óńirinde nan baǵasy jergilikti bıliktiń kelisimimen osydan eki jyl buryn 55 teńgeden 65 teńgege kóterilgen bolatyn. Endi búgin bes teńgege taǵy da qymbattap otyr.
Hamıt Esaman,
«Egemen Qazaqstan»
Jambyl oblysy