Almaty polısııasy Bostandyq aýdanyndaǵy kóliktiń eski bólshekterin satý núktesin tekserdi.
Qalalyq PD baspasóz qyzmetiniń habarlaýynsha, saýdager kóliktiń eski bólshekterin óziniń garajynda satýmen aınalysqan.
«Birneshe saǵat buryn mobıldi top eski kólik bólshekteri saýdalanǵan saýda núktesin anyqtady. Qojaıyn dúkendi óziniń garajynan ashyp qoıǵan. Tekserý barysynda 100 aına men 3 akkýmýlıator tabyldy. Tárkilengen bólshekterdiń arnaıy qujaty joq bolyp shyqty. Qazir bul zattardyń burynǵy qojaıyndary izdestirilip jatyr. Sonymen qatar, aınalardyń urlanǵandyǵy da tekserilip jatyr. Japa shekken azamattar bólimshege kelip, óz zattaryn alýda», - dedi Almaty qalasy Bostandyq aýdandyq Polısııa basqarmasynyń basshysy Dáýren Ýtebaev.
Tártip saqshylary aınasyn urlatyp alǵan kólik júrgizýshileri bolsa, Bostandyq aýdandyq Polısııa basqarmasyna habarlasýlaryn suraıdy.