Búgin Qazaqstan Respýblıkasy Úkimetiniń otyrysynda Premer-Mınıstr Baqytjan Saǵyntaev kún tártibiniń máselelerin qarastyrar aldynda órt kezinde qaza tapqan bes balanyń ata-anasy men týǵan-týystarynyń qaıǵy-qasiretine ortaqtasyp, kóńil aıtty.
Jan túrshigerlik jaǵdaı Astanada 4 aqpan kúni oryn aldy.
«Bir otbasynyń basyna túsken aýyr qaıǵy. Aı-kúnniń amanynda bes birdeı balasynan aıyrylyp qalǵan ata-anasyna Qudaı kúsh-qýat bersin. Marqum bolǵan balalardyń ata-anasyna, týǵan-týystaryna, barsha aǵaıyndaryna qaıǵyryp, kóńil aıtamyz», — dedi B. Saǵyntaev.
Astana qalasynyń ákimi B. Sultanovtyń jáne QR ishki ister mınıstri Q. Qasymovtyń atalǵan otbasyǵa qoldaý kórsetý boıynsha atqarylyp jatqan jumystar men aldaǵy ýaqytta osyndaı jaǵdaılardyń oryn almaýy úshin qabyldanyp jatqan sharalar týraly baıandamalary tyńdaldy.
QR Premer-Mınıstri B. Saǵyntaev aldaǵy táýlikterde birqatar óńirlerde kúnniń qatty sýytatynyna oraı, ákimdikterdiń, órt sóndirý jáne tótenshe jaǵdaılar qyzmetteriniń nazaryn órt qaýipsizdigi máselesine aýdardy. О́ıtkeni, jylý jelilerinde jylý berý temperatýrasy artady, jeke úılerde pesh jaǵý da kúsheıe túsedi. Sondyqtan, qaýipsizdik tehnıkasynyń saqtalýyna erekshe nazar aýdarý tapsyryldy.
QR Ishki ister mınıstrligine jergilikti atqarýshy organdarmen birlesip, jylý berý maýsymy aıaqtalǵansha órt qaýipsizdigi aılyǵyn qaıta bastaý tapsyryldy. Jylý men energııa beretin barlyq uıymdar, ákimdikterdiń turǵyn-úı kommýnaldyq qyzmetteri tutynýshylardy jetkilikti deńgeıde jylýmen jáne jaryqpen qamtamasyz etýi tıis. Barlyq qyzmetter irkilissiz jáne apatsyz jumys isteýi qajet. Bul máseleni ákimdikterge erekshe baqylaýǵa alý tapsyryldy.
Sonymen qatar, oblys ákimdikteri men QR IIM-ge qaıǵyly oqıǵalardyń aldyn alý maqsatynda jeke úılerdegi órt qaýipsizdigine júrgiziletin tekserister sapasyna erekshe kóńil bólý tapsyryldy. Qatań talap bolýy tıis.