3 jyl ishinde «Jas maman» jobasyna qatysatyn stýdentter sanyn jylyna 50 myń adamǵa deıin jetkizý josparlanyp otyr. Bul týraly Úkimet otyrysynda Bilim jáne ǵylym mınıstri Erlan Saǵadıev aıtty.
Qazirgi kezde jobaǵa qatysatyn stýdentterge kelesi áleýmettik qyzmet túrleri qaralǵan:
1. Inklıýzıvti bilim berý, múgedek balalarǵa kómek kórsetý.
2. Repetıtorlyq – qazaq tili, aǵylshyn tili, orys tili, kompıýterlik saýattylyq jáne taǵy basqa.
3. Devıantty minez-qulyqty kámelet jasqa tolmaǵan balalarmen jumys.
4. Aýla jáne sport klýbtaryn uıymdastyrý.
5. Qart adamdarmen áleýmettik jumys.
«Biz osy jumystarǵa ortaq onlaın platforma qurýdy josparlap otyrmyz. Oǵan qatysatyn stýdentter men stýdentterdi tartatyn uıymdar tirkeletin bolady.
Stýdentterge 2 jáne 5 akademııalyq kredıtke arnalǵan, 1 semestrde 20 jáne 50 saǵat 2 túrli vaýcher usynylatyn bolady, sonymen qatar, árbir saǵatqa bir myń teńge aqsha tólenip, sol kredıtterdi ýnıversıtet, kolledj synaq retinde qabyldaıdy» dedi mınıstr.
Áleýmettik stýdenttik jumystar balalar úıinde, arnaıy mektepterde, Jastarǵa qyzmet kórsetý ortalyqtarynda, Oqýshylar saraıynda, Qarttar úıinde, emhanalarda, joǵary oqý oryndarynda, mektepterde, kolledjderde júzege asatyn bolady.
Joba operatory – mınıstrlikke qarasty «Qarjy ortalyǵy» AQ.
«Biz bilim berý salasyndaǵy jańalyqtar boıynsha, onyń ishinde joǵaryda atalǵan 2 joba boıynsha halyq arasynda aqparattyq-túsindirý jumystaryn júrgizemiz. Qazirdiń ózinde pedagogtermen jáne ata-analarmen tikeleı baılanys jasaý úshin tanymal messendjer arqyly kommýnıkasııa júıesi quryldy. Búgingi tańda bul resýrspen 3 mln-nan astam adam qamtyldy» dedi Erlan Saǵadıev.
Sonymen qatar, mınıstr júzden astam tok-shoý, beınerolıkter jáne pıar is-sharalar uıymdastyrylyp jatqanyn, osy baǵyt boıynsha jumystar jalǵasa beretinin jetkizdi.