Túrkistan qalasy mańynan ótken jyly 320 gektar jer «Jasyl aımaq» kommýnaldyq memlekettik mekemesiniń teńgerimine alyndy. Onyń 300 gektary óńdelip, 200 gektaryna badam (mındal), qaraǵash, órik kóshetteri egildi. Bul týraly Túrkistan oblysy ákiminiń baspasóz qyzmeti habarlady.
Sonymen qatar, Túrkistan qalasy aýmaǵyndaǵy 740 gektar jer telimi «Jasyl aımaqtyń» teńgerimine alynyp, memlekettik akti alý jumystary júrgizilýde. Budan ózge, aǵymdaǵy jyly Túrkistan qalasy aýmaǵynda «Jasyl beldeý» alqabynyń jumysy bastalady. Bul týraly О́ńirlik kommýnıkasııalar qyzmetinde ótken baspasóz máslıhatynda Túrkistan oblystyq tabıǵı resýrstar jáne tabıǵat paıdalanýdy retteý basqarmasynyń basshysy Ilııas Quramysov málimdedi.
Sondaı-aq, ótken jyly memlekettik orman qoryn 1 mln. 593 myń gektarǵa ulǵaıtý jospary 101 paıyzǵa artyǵymen oryndalyp, ormanmen kómkerilgen alqap kólemi 1 mln. 604 myń gektarǵa jetken
«2018 jyly óńirde 15 500 gektarǵa kóshet otyrǵyzyldy. 104 gektar taýly jáne toǵaıly alqapqa, 600 gektar qumdy alqapqa sekseýil kóshetteri egildi. 7 myń gektarǵa sekseýil tuqymy sebildi. Sonymen qatar, 5 682 gektar jerde tolyqtyrý jáne 18 256 gektarda kútip-baptaý jumystary júrgizildi. О́tken jyly Otyrar orman sharýashylyǵynyń 66 myń gektar aýmaǵynda ornalasqan Qarataý ormanshylyǵyna tabıǵı-ǵylymı negizdeme jasalyndy. Atalǵan aýmaqta erekshe tabıǵatymyzdy keleshek urpaqqa jetkizý jáne sırek kezdesetin ań-qustarymyzdy qorǵaý, kúzetý maqsatynda Turan memlekettik óńirlik tabıǵı parkin ashý josparlanýda», - dedi Ilııas Shoıbekuly.
Syrdarııa ózeniniń boıyndaǵy tuqymbaqta jartylaı erkindikke jiberilgen Buqar buǵylarynyń sany byltyr 9 basqa artyp, 155-ke jetti. Olardyń 84-i ishki qorshaýda, 71-i erkindikte júr. 2018 jyly Búkilálemdik tabıǵat qorymen (WWF) óńirlik parkten 5 bas buǵy Ile-Balqash memlekettik tabıǵı rezervatyna jersindirildi.
Oblysta jyldan jylǵa jer qoınaýyn paıdalaný salasynyń ınvestısııalyq tartymdylyǵy joǵarylap keledi. Jer qoınaýyn paıdalanýshylar esebinen óńirdiń áleýmettik salasyna 2018 jyly 1 mlrd. 226 mln.teńge qarajat aýdarylǵan. Onyń 92 mıllıonǵa jýyǵy keń taralǵan paıdaly qazbalardan túsip otyr. Al, ormandy jáne erekshe qorǵalatyn tabıǵı aýmaqtardy paıdalanýdan 31 mln. 52 myń teńge, janýarlar dúnıesin paıdalanýdan 132 mln. 621 500 teńge túsim túsirildi.