Parlament Májilisiniń depýtattary Arman Qojahmetov, Snejanna Imasheva, Olga Shıshıgına, Quralaı Qareken Qarabalyq aýdanyna jumys saparymen bardy. Halyq qalaýlylary elimiz boıynsha eń iri mal bordaqylaý alańy bar «Astyq ındýstrııasy» agroholdınginiń tynys-tirshiligimen tanysty.
Aıta ketý kerek, búginde bul iri seriktestikke birneshe kásip nysany kiredi. Sonyn biri - «Terra» JShS mal bordaqylaý alańy. 2011 jyly alǵash ret Aýstralııa eliniń «Aberdın – angýs» tuqymyn ákelip, iri qara basyn kóbeıtýdi maqsat etken edi. Keıingi jyldary irgeli sharýashylyq mal basyn 8 myń basqa deıin jetkizip, ótken jyly 20 myń mal basy kórsetkishin baǵyndyrdy. «Astyq ındýstrııasy» holdınginiń basshylyǵy Májilis depýtattaryna júzege asqan jobalar men baǵyndyrǵan jetistikteri jaıly baıan etti. Ásirese, sońǵy jyldary sátti bastamalardyń biri asyl tuqymdy mal basyn kóbeıtý isi órge domalap keledi.
- Et klasteriniń negizgi maqsaty – sıyr etiniń kólemin odan ári arttyrý. Mysaly, 2018 jyly 101 myń mal basyna shaqtalǵan mal bordaqylaý alańyn turǵyzdyq. Bul degenimiz 2,5 myń tonna sıyr eti bolsa, onyń jartysynan kóbi Reseı jáne О́zbekstanǵa eksporttaldy, - deıdi «Astyq ındýstrııasy» agroholdınginiń bas dırektory Dáýlet Ahmetqalıev.
Onyń sózinshe, aldaǵy ýaqytta kompanııa 5 myń tonna et óndirip, 2 myń tonnasyn syrtqa jóneltýdi mejelep otyr. Sharýashylyqta sıfrly tehnologııalar da keńinen qoldanylady. «Aqyldy et fermasy» óz tıimdiligin kórsetip, shyǵyndy azaıtýǵa múmkindik berdi. Iri qaraǵa arnalǵan arnaıy azyq berý júıesi de qurastyrylǵan.
- Taǵy bir basymdyq berilgen eksporttyq pozısııa – et. Búginde Qazaqstan 900 myń tonnadan astam et óndiredi, osy baǵyt boıynsha úlken eksporttyq áleýetke ıe. Búginde barlyq mal basy men ónimdilikti arttyrýǵa elimizdiń zor múmkindigi bar. Al mal sharýashylyǵy ónimderin ótkizý naryqtarynyń syıymdylyǵyna keler bolsaq, ol eldiń ishki naryǵynda da, shekaralas memleketter boıynsha da jetkilikti. Osylaısha, eldiń agroónerkásiptik kesheni úlken áleýetke ıe bolǵandyqtan, onyń syrtqy naryqtaǵy damý keleshegi zor. 2017-2027 jyldarǵa arnalǵan Ulttyq baǵdarlamada asyl tuqymdy mal basyn kóbeıtýge de erekshe den qoıylyp otyr. Bir ǵana jergilikti holdıng ózge iri sharýashylyqtarǵa úlgi bola alatyndyǵyn aıtady, - dedi Parlament Májilisiniń depýtaty Arman Qojahmetov.
Holdıngke qarasty «Terra» sharýashylyǵynda 40 tan astam qyzmetker bar. Memlekettik baǵdarlamalar aıasynda sýbsıdııalar da qarastyrylǵan. Holdıng basshylyǵy bolashaqta et óndirý isin dóńgeletip, halyqaralyq deńgeıge shyǵý jospary bar ekendigin aıtty.
Al halyq qalaýlylary mal sharýashylyǵy salasyndaǵy keń kólemdi jobalarǵa oń baǵalaryn berdi. Aldaǵy ýaqytta et óndirisi alǵa basyp, ekonomıkanyń negizgi tiregine aınalatyndyǵyna senim bildirdi.