Astana tórinde ótken «Táýelsizdik urpaqtary» atty Jastar jylynyń resmı ashylý saltanatyn I.Jansúgirov atyndaǵy Jetisý memlekettik ýnıversıtetiniń oqytýshylary men stýdentteri tikeleı efır arqyly tamashalady. Alǵashqy kezekte elge tanymal, bilimdi, isker, óz kásibin júrgizip júrgen jastardyń jigerli sózderin estip, olardyń jas ta bolsa atqaryp jatqan úlken isterimen tanysyp, qanattana tústik.
Al Elbasynyń sózi boıymyzǵa jiger berip, patrıottyq sezimimizdi ushtady. Bizdiń Qazaqstannyń bolashaǵyn qalaıtyn azamattar ekendigimizdi taǵy bir márte tereń sezinýimizge jol ashty. Elbasy bıylǵy jyldy – Jastar jyly dep jarııalaýy teginnen-tegin emes. Bul bizge berilgen úlken múmkindik. Biz táýelsiz eldiń urpaǵy Elbasynyń salıqaly saıasatyn júzege asyrý arqyly jastardyń qolynan ne keletinin dúnıejúzine tanytýymyz kerek. Olardyń qolynan qandaı is keletinin sózben emes, ispen dáleldeýimiz qajet.
Elbasy búgingi jastarǵa qarata aıtqan sózinde de elimizdiń kórikti jerleriniń bárin aralaǵanyn, ásirese Almaty oblysynda maqtan tutarlyq jerimizdiń kóp ekendigin atap ótti. Bizde Sharyn shatqaly, Altynemel syndy ózgelerge maqtanyshpen kórsetetin tabıǵı baılyǵymyz jeterlik. Sony qoljetimdi etip, týrızmdi damyta bilsek, elimizdiń abyroıy budan beter arta túsedi dep oılaımyn. Sondaı-aq Elbasy jastardy sapaly bilim alyp, ǵylymdy damytýǵa, órkenıet kóshinen qalmaı ýaqyt talabyna saı adymdaýǵa shaqyrdy. Jas ǵalymdardy qoldaý maqsatynda bólinetin grant kólemin eki ese arttyrýdy tapsyrdy. Bul bizge úlken serpin berdi.
Damır DIGAI,
I. Jansúgirov atyndaǵy Jetisý memlekettik ýnıversıteti ǵylymı jańalyqtardy
kommersııalandyrý
ortalyǵynyń dırektory
TALDYQORǴAN