Qoǵamdyq densaýlyq saqtaý basqarmasy úsikten saqtaný boıynsha keńes berdi. Bul týraly Astana qalasy ákimdiginiń baspasóz qyzmeti habarlady.
Úsik shalǵan kezdegi alǵashqy kómek. Eń aldymen, úsik shalý belgileri bar naýqasty jyly jaıǵa jetkizip, aıaq kıimin, shulyǵyn jáne qolǵabyn sheshý kerek. Dereý jedel járdem shaqyrtý qajet. I dárejeli úsik shalǵanda úsigen teri qabatyn qyzarǵansha jyly alaqanmen jylytyp, ýqalaý qajet, jún matamen, demniń jylýymen jylytyp, sońynan maqta-dákemen tańady. Zardap shekken janǵa ystyq as, ystyq shaı berýge bolady. Jáne aspırın men analgın bergen jón ol qan tamyrlaryn úlkeıtip qannyń júrýin jaqsartady.
Naýqasty jylytý maqsatynda ishimdikter berýge, sonymen qatar, úsýge ushyraǵan teri aýmaqtaryn ıntensıvti túrde qarmen, maımen, spırtti eritindilerimen ýqalaýǵa múldem bolmaıdy. Úsigen adamdy aldyn ala jyly temperatýrada jylytyp almaı, ystyq sýly vannaǵa salýdy áreket etpeńiz. Naýqasty jylytý maqsatynda laýlap turǵan otty paıdalanýǵa tyıym salynǵan. II-IV dárejeli úsik shalǵanda tez jylytý, massaj nemese ýqalaý jasaýdyń qajeti joq. Zaqymdalǵan jerge jylý shyǵarmaıtyn dáke tańý qajet (qabattalǵan mata, qalyń maqta qabaty, taǵy da mata, ústinen kleenka nemese rezeńke mata).Sol sebepti de birden jedel járdem shaqyryńyz.
Kóbinese qorǵalmaǵan qol, bet, qulaq úsikke shalynady. «Úsikten qorǵaný maqsatynda keń jáne jyly kıingen jón. Aıaq kıim keń bolǵany jaqsy, eger baqaılaryńyz aıaqkıim basyna tıip tursa, aýa aınalmaıdy da, aıaǵyńyz tońyp, úsip ketýi múmkin. Jáne sý ótkizbeıtin, tabany qalyń aıaq kıim kıgen abzal. Aıazda temir, kúmis, altyn áshekeıler taqpaǵan durys. Qulaq pen betińizdi mindetti túrde jaýyp júrińiz. Muryn tez tońyp, úsip ketýi múmkin. Qatty sýyqta tek murynmen demalyńyz» dep keńes beredi Astana qalasy Qoǵamdyq densaýlyq saqtaý basqarmasy.
Ishimdik ishpeńiz, ol dene jylyǵandaı áser etedi, biraq olaı emes. Durys tamaqtanǵan jón. As jylý beredi. Tońsańyz, ystyq shaı ishińiz nemese ystyq as ishińiz. Temeki tartpańyz, ásirese, aıazdy kúni. Temeki qan aınalymyn nasharlatady.