Qaraǵandyda bıylǵy jyldyń tuńǵysh úshemi dúnıege keldi. Dáriger mamandardyń aıtýynsha, Jibek, Aıala jáne Sezim atty sábıler shala týsa da, qazir ózderin jaqsy sezine bastaǵan.
«Náresteler jaryq dúnıege merziminen buryn keldi, – deıdi oblystyq perınataldyq ortalyq dırektorynyń orynbasary Gúlnár Ǵalıeva. – Sondyqtan olar biraz ýaqytqa deıin dárigerlerdiń baqylaýynda bolady».
Jas bosanǵan ana Botagóz Jaınabekova úshemderge deıin eki ul, bir qyzdyń anasy atanǵan. Iаǵnı, qazirgi tańda onyń otbasynda alty bala bar.
– Qıyndyqtyń bári artta qaldy. Árıne, basynda qorqynyshty boldy. Bizdiń tuqymda mundaı oqıǵa birinshi ret bolyp tur. Dárigerlerge degen alǵysym sheksiz. Úshemge júkti ekenimdi eshkimge aıtpaı, qupııa saqtap keldik. Týǵan-týystardyń qýanyshynda shek joq, – deıdi kópbalaly jas ana.
Botagózdiń jubaıy slesar bolyp jumys isteıdi eken. Eńbekaqysy ortasha eseppen alǵanda 100 myń teńge. Endi oǵan osynsha mólsherdegi jalaqymen otbasyndaǵy segiz jandy asyrýǵa týra keledi.
Qaırat ÁBILDA,
«Egemen Qazaqstan»
Qaraǵandy