«Halyq qazynasy» mýzeı aksııasy aıasynda ««Botaı – babalardyǹ murasy» halyqaralyq kórmesi Shal aqyn aýdanynda ótti.
О́ńirdiń mádenı qundylyqtaryn ulyqtaý, onyń ishinde «Botaı» eskertkishin nasıhattaý, týǵan ólke tarıhyna jurtshylyqtyń qyzyǵýshylyǵyn arttyrý maqsatyn dittegen ıgi sharaǵa «Arheologııa jáne dala órkenıetteri» ǵylymı zertteý ınstıtýtynyń dırektory, tarıh ǵylymdarynyń doktory Vıktor Zaıbert, Ońtústik Oral memlekettik ýnıversıtetiniń kafedra meńgerýshisi, Ǵylymı bilim berý ortalyǵynyń dırektory Aleksandr Taırov, ónersúıer qaýym, jastar qatysty.
Halyqaralyq kórmeniń ashylýynda sóılegen sózinde aýdan ákimi Nurlan Esimov Elbasy «Uly dalanyń jeti qyry» maqalasynda Otan tarıhyna jańasha qaraýdyń kózqarasyn túzip bergenin atap kórsetti.
«Kóptegen kórnekti mádenı jetistiktiń Qazaqstannan tamyr alatynyn biz maqtan tutamyz. Ony árbir qazaqstandyq erekshe qasterleıdi. Baǵa jetpes tarıhı jádigerler ata-babalarymyzdyń óz zamanynyń eń ozyq tehnologııalaryn qoldanǵanyn rastaıdy. Uly dala álemge jylqy sharýashylyǵyn damytqan tuńǵysh el retinde jaqsy tanys», dedi aýdan ákimi.
Botaı qonysyn ejelgi adamdar mekendep, jylqy túligin qolǵa úıretkenin arheologııalyq qazbalar aıǵaqtaıdy. Osy turǵydan oı terbegen V. Zaıbert Botaı mádenıetimen jete tanysýdyń mańyzdylyǵyn taldap berdi. Búgingi jas urpaq ulttyq tarıhtyń qaınar kózderi tereńnen bastaý alatynyn bilip ósýi tıis, dedi ol. Arheolog ǵalymnyń aıtýynsha, Botaı qonysy eneolıt dáýiriniń arheologııalyq eskertkishi bolyp tabylady.
Aıyrtaý aýdanynyń Iman-Burlyq ózeniniń oń jaǵalaýynda ornalasqan. О́tken ǵasyrdyń seksenishi jyldary onyń jetekshiligimen alǵashqy arheologııalyq ekspedısııa qazba jumystarymen aınalysyp, jebelerdiń ushtary, drotıkter, baltalar, súıek qashaýlary sekildi mol oljaǵa kezikken. Botaılyqtar keshendi kóp salaly sharýashylyqtarmen aınalysqan. Jylqyny qolǵa úıretip, kólik , minis retinde paıdalanǵan.Tas, súıek, aǵash, teri óńdegen. Biregeı sáýlet tásilderin meńgere otyryp kúrdeli qurylystar salǵan.
A.Taırov, oblystyq Mádenıet, arhıv, qujattamalar basqarmasy basshysynyń mindetin atqarýshy Dosbol Abdrısov óz sózderinde «Uly Dalanyń jeti qyry» maqalasynan týyndaıtyn mindetterdi, óskeleń urpaqty otanshyldyqqa tárbıeleýdegi kórme, mýzeılerdiń rólin arqaý etti.
Jınalǵandar «Botai – babalardyn murasy» kórmesin tamashalap, Botaı eldi mekeninen tabylǵan qundy jádigerlermen tanysty.
О́mir ESQALI,
«Egemen Qazaqstan»
Soltústik Qazaqstan oblysy