Qurlyqtyq hokkeı lıgasynyń (QHL) bıylǵy maýsymynda Astananyń «Barysy» jaqsy nátıje kórsetip, aıshyqty ónerimen óz jankúıerlerin qýantýda.
Dáp qazirgi kezde olar Chernyshev dıvızıonynda kósh bastasa, Shyǵys konferensııasynda ekinshi satyǵa jaıǵasty. Al turaqty birinshilikte besinshi orynǵa turaqtady. Al alda áli alty básekeniń baryn eskersek, jerlesterimizdiń bul kórsetkishi jaqsara túsetini sózsiz.
Alaıda Gagarın kýbogy qarsańynda Kertıs Volk, Brendon Bochenskı jáne Mettıý Frettınniń jaraqat alýy astanalyq klýbtyń bapkerlerin qatty alańdatyp otyr. Olardyń úsheýi de «Barystyń» betkeustar oıynshylary. Máselen, 1 aqpanda jaraqattanǵan Kertıs Volktiń enshisinde 27 upaı (9 gol+18 pas) bar. 4 aqpanda bir-birimen soqtyǵysyp qalǵan Brendon Bochenskı men Mettıý Frettınniń de kórsetkishteri joǵary. Osy kúnge deıin Bochenskı 32 upaı (14 gol+18 pas) jısa, Frettın 39 upaıdy (17 gol+22 pas) enshiledi. Árıne, osyndaı sheber shabýylshylar sheshýshi matchtarda qatarǵa qosyla almasa, «Barystyń» biraz álsireıtini anyq.
Ǵalym SÚLEIMEN,
«Egemen Qazaqstan»