AQSh-tyń azamattyq jáne ımmıgrasııa qyzmeti (USCIS) óziniń Máskeý keńsesiniń jabylǵany týraly jarııalady. Qazaqstan azamattarynyń ımmıgrasııaǵa baılanysty birqatar máseleler boıynsha Afınaǵa júginýine týra keledi. Bul týraly vedomstvonyń resmı saıty habarlady.
«USCIS jumys kúshiniń aıtarlyqtaı tómendeýine baılanysty 2019 jyldyń 29 naýryzynda Máskeýde óz keńsesin jabady. 28 aqpan kúni sońǵy ótinishterdi qabyldaıdy», - delingen habarlamada.
Máskeý keńsesi jabylǵannan keıin Reseı Federasııasy, Armenııa, Ázirbaıjan, Belarýs, Estonııa, Grýzııa, Qazaqstan, Qyrǵyzstan, Latvııa, Lıtva, Moldova, Tájikstan, Túrikmenstan, Ýkraına jáne О́zbekstan azamattarynyń ótinishterimen Afınadaǵy USCIS keńsesi aınalysatyn bolady.
Bul rette Qazaqstandaǵy AQSh Elshiliginiń saıtynda otbasyn biriktirý, jumys ımmıgrasııasy, grın-kard jáne AQSh-ta neke qııý máseleleri boıynsha Qazaqstan azamattary Almatydaǵy AQSh konsýldyǵyna habarlasa alady,al bosqyndar USCIS Afına keńsesine júginýi qajet.
«Almatydaǵy AQSh Bas konsýldyǵynyń konsýldyq bólimi Qazaqstan, Qyrǵyzstan jáne Tájikstan turǵyndary úshin ımmıgrasııalyq vızalardy rásimdeıdi. Qazaqstandaǵy AQSh elshiligi bosqyndardyń isterimen aınalyspaıdy. Bosqyn mártebesine úmitker adamdar AQSh - tyń kóshi-qon qyzmetine júginýi tıis», - delingen saıtta.