Jastardy jumyspen qamtý máselesine aıryqsha nazar aýdarylatyn bolady. Bul týraly «Memlekettik jastar saıasaty týraly» zańdy iske asyrý jáne Jastar jylyn ótkizý aıasynda memlekettik organdardyń, qoǵamdyq jáne úkimettik emes uıymdardyń aldynda turǵan mindetter týraly» dóńgelek ústelde Parlament Senatynyń Tóraǵasy Q. Toqaev málimdedi.
«Áleýmettik zertteýlerdiń nátıjeleri boıynsha elimizdegi jastardyń 40 %-ǵa jýyǵy turaqty túrde jumysqa ornalasý problemalaryn bastarynan ótkizedi eken. Alaıda, qazirgi ýaqytta jastardyń arasyndaǵy jumyssyzdyq barlyq álemde ótkir máselege aınalyp otyr. Sońǵy derekter boıynsha jastardyń jumyssyzdyq deńgeıi 13%-dy quraıdy, al keıbir elderde 40%-ǵa jetedi. BUU derekteri boıynsha álemdegi árbir besinshi jas oqymaıdy jáne jumys istemeıdi», dedi Parlament Senatynyń Tóraǵasy.
Onyń aıtýynsha, jastardyń jumyssyzdyǵyn joıýdyń basty múmkindikterin shaǵyn jáne orta bıznes salasynan tabýǵa bolady.
«Bizdiń jastarymyzdyń boıynda kásipkerlik bastamalardy iske asyra bilý qabiletin tárbıeleý qajet. Qazaqstanmen salystyrǵanda ekonomıkalyq jaǵdaıy anaǵurlym qıyn jaǵdaıdaǵy kórshi memleketterdiń jastarynyń qanshalyqty ıkemdi, isker ekeni, óz shaǵyn bıznesterin júrgizýge beıimdelgeni baıqalyp otyr. Bul elderde jastar jańa mamandyqtardy ıgergen, óz týystary men óz memleketine qoldaý kórsetý maqsatynda ózdiginen jumys taýyp, shetelderde de jumys isteýde. О́kinishke oraı, kásipkerlik salasy Qazaqstan jastaryn áli de qyzyqtyrmaı otyr. Áleýmettik saýaldardyń derekteri boıynsha suralǵan jastardyń 51 %-ynyń bıznespen aınalysý týraly oı josparynda joq eken. Bul problemaǵa basqa jaǵynan qaraǵan durys. Múmkin, biz bıznespen aınalysý úshin ózimiz tıisti jaǵdaı jasamaı otyrǵan shyǵarmyz?», dedi Q.Toqaev.
Sondaı-aq ol «Jas maman» baǵdarlamasy jańǵyrtylǵan 200 oqý ornynyń negizinde ındýstrııalyq jáne servıstik baǵyttaǵy 100 asa qajetti mamandyq boıynsha mamandardy daıarlaý kózdelgenin atap ótti.
«Jastardyń kásipkerligin yntalandyrý «Bıznestiń jol kartasy-2020» baǵdarlamasy boıynsha granttardyń kólemin eki ese ulǵaıtýdy kózdeıdi. Jastardyń startaptaryn qoldaý qory qurylyp, jastardy bıznestiń negizderine oqytý jolǵa qoıylady, ár óńirde sany 100 myńǵa deıingi bilimdi jumyssyz jastar men ózin-ózi jumyspen qamtyǵan adamdarǵa arnalǵan «Jas kásipker» baǵdarlamasy daıyndalatyn bolady», dedi ol.