21 naýryzda «Almaty Arena» sport kesheninde «Alash Praıd» klýbynyń muryndyq bolýymen erejesiz jekpe-jekten iri halyqaralyq týrnır uıymdastyrylady.
Ázirge Qazaqstan jaǵynan osy jarysqa kimderdiń qatysatyny belgili. Olar – Ermek Tlaýov, Asyljan Baqytjanuly, Asaý Almabaev, Baqtııar Nesipbek, Evgenıı Egemberdıev, Ǵalymjan Qanaev, Artem Reznıkov jáne taǵy basqalary. Bul jigitterdiń barlyǵy da talaı dúrmekte ysylǵan saqa sportshylar. Sondaı-aq, Qytaıda týyp-ósip, álemdegi eń beldi uıym – UFC-de kúsh synasqan tuńǵysh qandasymyz Jumabek Tursyn da osy keshte óz ónerin ortaǵa salady. Osy básekeler barysynda eki birdeı altyn belbeý sarapqa salynady.
Almatyda ótetin jarysqa biz erejesiz jekpe-jek áleminde zor bedeli bar sportshylardy shaqyrtýdy kózdep otyrmyz. Qazirgi kezde sol sańlaqtar jáne olardyń promoýterlerimen kelissózder júrgizilýde. Osy is aıaqtalǵannan keıin Qazaqstanǵa naqty kimderdiń keletinin jarııalaımyz. Bir anyǵy – biz syrttan tek myqtylardy ǵana shaqyrtamyz. Jáne de osy jarysty tamashalaýǵa qurmetti qonaq retinde osy sport túriniń has sheberi Habıb Nurmaǵambetov te keledi dep kútilýde, – deıdi «Alash Praıd» klýbynyń prezıdenti Danııar Qasqaraýov.
Ǵalym SÚLEIMEN,
«Egemen Qazaqstan»