Shıelide kópir men aınalma jol jóndeýden ótti. Jańadan tartylǵan jol aýdandaǵy ýran óndiretin kásiporyndarǵa qajetti hımııalyq qyshqyldardy tasymaldaý úshin kerek bolǵan.
Qazaqstannyń ekonomıkasy kóterilip, álemdegi irgeli memlekettermen básekelesý úshin qýatty kásiporyndar kerek. Biraq óndiris oryndarynyń toqtaýsyz jumys isteýine qajetti hımııalyq zaýyttardyń ekologııaǵa, adam densaýlyǵyna zııany baryn aıtpasqa bolmaıdy. Máselen, fosfor alý úshin qazylǵan uńǵyǵa silti qyshqyly quıylady. Osyndaı uńǵylardan shyqqan sýdy mal iship, ýlanǵan oqıǵalar bar.
Jańa jol týraly erekshe aıtyp otyrǵanymyz, ýran óndirýge qajetti qaýipti qyshqyldardy tasymaldaǵan kólikter Shıeliniń irgesindegi Eńbekshi aýylyn janaı ótetin. Aýyl turǵyndary oıqy-shoıqy jolda kúkirt tasymaldaǵan júk mashınalarynyń birneshe ret aýdarylǵandyǵyn aıtatyn. Jaramsyz jol ekologııalyq ahýaldy shıelenistirip jibergennen keıin turǵyndar tıisti oryndarǵa shaǵym túsirgen bolatyn. Shıeli aýdanynyń ákimi Áshim Orazbekuly «Qazatomprom» AQ basshylyǵyna oblys ákimi Qyrymbek Kósherbaevtyń arnaıy shyǵyp, jaǵdaıdy túsindirgennen keıin osy máseleniń ońtaıly sheshilgendigin aıtady. Búginde kúkirt tasymaldaǵan mashınalar Eńbekshi aýylynyń syrtymen ótedi.
Keshege deıin hımııalyq zattardy saqtaıtyn qoıma aýdan ortalyǵynda bolyp kelgen. Endi qoıma turǵyndarǵa qaýipsiz jerge kóshirildi. Kókshoqy eldi mekenindegi kásiporyn da ındýstrııalyq aımaqtan ornyn tapty.
Osylaısha, aýdan halqyn alańdatqan óndiris orny turǵyndardyń ótinishi boıynsha qaýipsiz aımaqqa kóshirilip, jumysyn bastap ketti.
Baqtııar TAIJAN,
«Egemen Qazaqstan»
Qyzylorda oblysy