Búgin konkýrstyq komıssııanyń sheshimi boıynsha Batys Qazaqstan oblysynyń tabıǵı resýrstar jáne tabıǵat paıdalanýdy retteý basqarmasynyń basshysy laýazymyna – Sháýenov Rınat Satymuly, al Batys Qazaqstan oblysynyń jerdiń paıdalanylýy men qorǵalýyn baqylaý basqarmasynyń basshysy laýazymyna - О́mirálıev Murat Amangeldiuly taǵaıyndaldy.
Rınat Sháýenov Jáńgir han atyndaǵy Batys Qazaqstan agrarlyq-tehnıkalyq ýnıversıtetin «menedjer-ekonomıst» mamandyǵy boıynsha bitirgen. Ár jyldary Tasqala aýdany ekonomıka jáne bıýdjettik josparlaý bóliminiń bas mamany, Bórli aýdanynyń turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi meńgerýshisiniń orynbasary, Oral qalalyq kásipkerlik bólimi basshysy bolyp qyzmet atqarǵan. 2016 jyldyń qyrkúıeginen búginge deıin Báıterek aýdany ákiminiń orynbasary boldy.
Al Batys Qazaqstan oblysynyń jerdiń paıdalanylýy men qorǵalýyn baqylaý basqarmasynyń jańa basshysy Murat О́mirálıev Mahambet О́temisuly atyndaǵy Batys Qazaqstan memlekettik ýnıversıtetin «tarıh», «zańger» mamandyqtary boıynsha támamdaǵan. Ár jyldary Shyńǵyrlaý aýdany ishki saıasat jáne áleýmettik sala bóliminiń bas mamany, Oral qalasy ákiminiń apparaty memlekettik-quqyqtyq jumystar bóliminiń bas mamany, meńgerýshisi. Oral qalasy ákiminiń apparaty uıymdastyrý-baqylaý, kadr jumysy jáne memlekettik qyzmet kórsetý monıtorıng bóliminiń meńgerýshisi, Oral qalasy ákimi apparatynyń memlekettik-quqyqtyq jumystar bóliminiń basshysy – qala ákimi apparaty basshysynyń orynbasary bolyp jumys istedi. 2015 jyldyń shildesinen búginge deıin Batys Qazaqstan oblysy Ádilet departamenti basshysynyń orynbasary laýazymynda boldy.
Qazbek QUTTYMURATULY,
«Egemen Qazaqstan»
Batys Qazaqstan