Karateden Dýbaıda ótken Premer-lıga kezeńinde Qazaqstan qurama komandasy úsh medal jeńip aldy dep habarlaıdy Olympic.kz.
60 kelide el namysyn qorǵaǵan tájirıbeli Darhan Asadilov Premer-lıga chempıony atandy. Ol buǵan deıin álem chempıonatynda qola júldeger atanyp, Premer-lıga kezeńinderinde júldegerler qataryna qosylyp júrgen bolatyn. Dýbaı tórinde ol Iýnýsoke Mınamıge aına qaldyrǵan joq.
67 kelidegi Dıdar Ámiráli fınalda qarsylasyna jol berip, kúmis júldeger atandy. Ol osy salmaqta álemdik reıtıngtiń kóshin bastaǵan fransııalyq Stıven-da-Kostamen jolyqqan bolatyn. Jekpe-jek 3:3 esebimen teń aıaqtaldy. Alaıda, birinshi bolyp soqqy jasaǵan fransýz jeńiske jetti.
Al 60 kelide synǵa túsken taǵy bir sportshymyz Qaısar Alpysbaı týrnırdiń qola medalin ıelendi. Ol álemdik reıtıngte birinshi turǵan ıtalııalyq Andjelo Krechenzony jeńgen.
Eske sala keteıik, qazaqstandyq karateshiler Premer-lıga kezeńderinen júldesiz kelgen emes. Jyl basynda Parıjde ótken kezeńde karateden Qazaqstan quramasy úsh qola jeńip alǵan bolatyn.