«Qazaqstan dauiri» gazeti «Nur Otan» partııasy, Aýyl sharýashylyǵy mınıstrligi jáne «ElAna» saıtymen birlesip jyl saıyn ekspedısııa uıymdastyryp keledi. Ekspedısııanyń basty maqsaty – elimizdiń ár oblys, aýdanyn aralap aımaq turǵyndarymen kezdesý, óńirdegi ózekti máselelerdi anyqtap ony tıisti mekemelerge jetkizý.
Atalǵan ıgi shara byltyr da jalǵasyn taýyp ekspedısııa quramy «Aýyl – rýhanı jańǵyrýdyń qaınar kózi» degen atpen barlyq óńirde boldy. Altaı men Atyraýdyń arasynda ótken ekspedısııa barysynda elimizdiń 27 jyldaǵy jetistikteri pysyqtalyp, áli de sheshilýi tıis máseleler gazet betinde jaryq kórdi. О́tken jumada óńirlerge jasalǵan sapardyń qorytyndysy retinde arnaıy jıyn uıymdastyrylǵan bolatyn. Oǵan «Nur Otan» partııasy, Parlament depýtattary, Aýyl sharýashylyǵy mınıstrliginiń ókilderi, zııaly qaýym ókilderi qatysty. Kezdesý barysynda «Qazaqstan dauiri» gazetiniń bas dırektory Sáýle Meshitbaeva atalǵan sharanyń bıyl onynshy ret ótkizilip otyrǵanyn aıtty.
̶ Elimizde 7,5 myń aýyl bar bolsa, «Qazaqstan dauiri» gazetiniń ujymy sonyń 5 myńnan astamyn aralap shyqty. Jýrnalısti aıaǵy asyraıdy demekshi, respýblıkanyń túkpir-túkpirin aralap qana qoımaı, sonda ómir súrip otyrǵan halyqtyń muń-muqtajyn, túıtkildi máselelerin qaǵazǵa túsiremiz. Tilshilerdiń qolynda bılik bolmaǵanymen, soǵan jetkizetin qarymdy qalamymyz bar. Barlyq kórgen-bilgenimizdi, túıgenimizdi tıisti organdarǵa, onyń basshylaryna jetkizemiz. Mańdaı terimizdi tógip, atqaryp jatqan jumystardyń nátıjesi de joq emes. Bir mysal, buryn «Dıplommen aýylǵa!» jobasymen eldi mekenderge muǵalimderdi, dárigerlerdi jiberetin edi. Keıin Aýyl sharýashylyǵy mınıstrligi men «Qazaqstan dauiri» gazeti tyǵyz qarym-qatynas ornatyp, basylymnyń usynysy boıynsha aýylǵa zootehnıkter men mal dárigerlerin de atalǵan joba arqyly jibertýge múmkindik týdy, –dedi S. Meshitbaeva.
Jıynda «Qazaqstan dauiri» basylymynyń bas redaktory Ertaı Aıǵalıuly byltyrǵy ekspedısııa aıasynda kóterilgen taqyryptarǵa toqtalyp, ár oblystaǵy aǵaıynnyń túıtkildi máselelerin baıandady. Ekspedısııanyń qorytyndysy boıynsha tujyrymdama jasaǵan gazet ujymy jastardy aýylǵa tartý, jergilikti ózin-ózi basqarý, aýyldaǵy ınfraqurylym, tabıǵı, óńirlik jaǵdaılarǵa baılanysty mamandandyrý, jem-shóp daıyndaý, kooperatıv máselesi syndy ózge de salalyq, maýsymdyq problemalardy jipke tizdi. Aýyldaǵy aǵaıynnyń amanatyn arqalaı kelgen ekspedısııa músheleri qoıylǵan saýaldardyń jaýabyn, máseleniń mán-jaıyn quzyrly organdardan surady. Jıynǵa qatysqan Aýyl sharýashylyǵy mınıstrligi jáne ózge de vedomstvo ókilderi aıtylǵan talap-tilekterge jaýap berip, aldaǵy ýaqytta naqty qandaı sharalar qabyldaý kerektigin egjeı-tegjeıli baıandady.
Erkejan AITQAZY,
«Egemen Qazaqstan»